سیاست کی آڑ میں عوام کیلئے مشکلات پیدا کیں تو سختی سے نمٹوں گی، مریم نواز
اردو انٹرنیشنل (مانیٹرنگ ڈیسک) لاہور میں نیوز کانفرنس کرتے ہوئے وزیراعلیٰ پنجاب مریم نواز نے کہا ہے کہ سیاست کی آڑ میں عوام کے لیے مشکلات پیدا کیں تو سختی سے نمٹوں گی۔
ان کا کہنا تھا کہ ہارے ہوئے مائنڈ سیٹ کا کام لڑائی جھگڑا، جلاؤ گھیراؤ ہے۔
وزیراعلیٰ پنجاب نے کہا کہ اپنی پہلی تقریر میں کئے گئے وعدوں کی تکمیل شروع ہو گئی ہے، 26 فروری کو حلف اٹھانے کے بعد صرف 9 روز میں عوام کو ریلیف دینے کے لیے رمضان پیکیج تیار کیا۔
مریم نواز نے کہا کہ محمد نواز شریف نے مکمل رہنمائی کی، نواز شریف کا ایجنڈا اور مشن عوام کو ریلیف فراہم کرنا ہے، رمضان میں پنجاب کے عوام کو اب قطاروں میں کھڑا نہیں ہونا پڑے گا۔
ان کا کہنا تھا کہ فکر تھی رمضان کچھ دنوں کی دوری پر ہے، پنجاب حکومت نے مہینوں کا کام دنوں میں کیا ہے، 3 سے 4 ماہ میں ساڑھے 12 کروڑ عوام کا سروے کریں گے۔
وزیراعلیٰ پنجاب کا کہنا تھا کہ ہمارا مقصد غریب کا حق اسے تکلیف دیے بغیر اس کی دہلیز پر پہنچانا ہے، پنجاب کے تمام محکموں نے ٹاسک کے مکمل ہونے میں بھرپور ساتھ دیا۔
انہوں نے کہا کہ تمام اضلاع کی انتظامیہ اور پنجاب انفارمیشن ٹیکنالوجی بورڈ کی مشکور ہوں، رمضان نگہبان پیکیج سے پنجاب کے تین کروڑ سے زائد لوگ مستفید ہوں گے، بی آئی ایس پی اور نادرا کے ڈیٹا کو کلب کر دیا ہے۔
مریم نواز کا کہنا تھا کہ آنے والے دنوں میں پنجاب حکومت ساڑھے 12 کروڑ عوام کا ڈیٹا اکٹھا کرے گی، وقت کی کمی کی وجہ سے بلک میں خریداری کرنا پڑی، رمضان پیکیج کے ہیمپر میں کوالٹی کا خاص خیال رکھا گیا ہے۔
انہوں نے کہا کہ پیکیج میں 10 کلو آٹا، 2 کلو گھی، 2 کلو چینی، 2 کلو چاول اور 2 کلو بیسن ہے۔
وزیراعلیٰ پنجاب نے کہا کہ کوالٹی کنٹرول کے لیے سورس پر لوگوں کو بٹھایا، ضلعی انتظامیہ اور پنجاب فوڈ اتھارٹی کو آٹے کی ملوں پر بٹھایا، جہاں پیکنگ ہو رہی ہے وہاں وہ کوالٹی کا خیال رکھ رہے ہیں، جو سیمپل منظور ہوئے صرف اس کی اجازت دی گئی۔
مریم نواز کا کہنا تھا کہ غیر معیاری پروڈکٹ تیار کرنے والی چار ملوں کو سیل بھی کیا گیا ہے، ضلعی انتظامیہ سے کہا ہے کہ وہ ہیمپرز کو کھول کر چیک کریں، ڈیلیوری میکنزم میں پنجاب انفارمیشن ٹیکنالوجی بورڈ (پی آئی ٹی بی) نے بہت مدد فراہم کی۔
انہوں نے کہا کہ ڈیلیوری میکنزم مکمل طور پر ڈیجیٹائز ہے، پی آئی ٹی بی نے اس بارے میں ایک مخصوص ایپلی کیشن تیار کی ہے، اس میں مختلف ڈیپارٹمنٹس کے لوگوں کو شامل کیا گیا ہے۔
مریم نواز کا کہنا تھا کہ یونین کونسل، محلوں کی سطح پر ڈیلیوری ٹیموں کو تقسیم کیا گیا ہے، پی آئی ٹی بی کی ایپلی کیشن ڈیلیوری ٹیموں کے لیے ہے، مزید کہا کہ ڈیلیوری ٹیموں کو کسی ناخوشگوار واقعہ سے بچنے کے لیے پولیس کی سیکیورٹی بھی فراہم کی گئی ہے۔
مریم نواز کا کہنا تھا کہ سی ایم مریم نواز کے نام سے ہیلپ لائن 080002345 قائم کی گئی ہے، 72 گھنٹے میں عوام کی شکایات کو حل کیا جائے گا، عوام اس نمبر پر کال کر کے رمضان پیکیج سے متعلق شکایت یا فیڈ بیک دے سکتے ہیں۔
انہوں نے کہا کہ ہر ضلع میں رمضان بازار بھی لگائے جائیں گے، عوام کو ان بازاروں میں رعایتی نرخوں پر اشیا دستیاب ہوں گی، پرائس کنٹرول پر پوری توجہ ہے، اس وقت پنجاب حکومت کے پاس پرائس کنٹرول کا کوئی ڈیپارٹمنٹ نہیں ہے۔
مریم نواز کا کہنا تھا کہ پرائس کنٹرول کا مکمل نظام تیار کیا جائے گا، ضلعی انتظامیہ کو ہدایات دی گئی ہیں کہ پرائس لسٹ پر عمل درآمد ہونا چاہئے، پرائس لسٹ کی خلاف ورزی پر گزشتہ روز 46 ہزار چھاپے مارے گئے، 4.2 ملین روپے کے جرمانے ہوئے، 133 ایف آئی آرز ہوئی ہیں اور 236 گرفتار ہوئے۔
وزیراعلیٰ پنجاب نے کہا کہ پرائس کنٹرول سے متعلق زیرو ٹالرینس ہے، ذخیرہ اندوزوں کو جرمانے بھی ہوں گے، گرفتاریاں بھی ہوں گی، ذخیرہ اندوزوں کے ساتھ سختی سے نمٹا جائے گا، پنجاب میں موجود گوداموں کو ضلعی انتظامیہ کے ساتھ رجسٹر ہونا چاہئے۔
