سابق وزیرخارجہ شاہ محمود قریشی کی بہو اغواء کے بعد بازیاب
جیل میں قید تحریک انصاف کے سینئر رہنماء شاہ محمود قریشی کی بہو کو گزشتہ رات نا معلوم افراد کی جانب سے اغواء کرلیا گیا تھا۔
شاہ محمود قریشی کی بیٹی مہربانو قریشی نے سوشل میڈیا پوسٹ میں اپنی بھابھی اور قومی اسمبلی کے رکن زین حسین قریشی کی اہلیہ کے اغواء کی خبر دی۔
ایکس پر مہربانو قریشی نے لکھا کہ میری بھابھی اور زین قریشی کی اہلیہ کو ہمارے گھر کے قریب سے سادہ کپڑوں میں ملبوس نقاب پوش افراد نے اغوا کر لیا ہے۔ دو گاڑیوں نے اس کی گاڑی کو روکا اور اسے زبردستی لے ساتھ اپنی گاڑی میں بٹھا کر لے گئے۔
انہوں نے مزید لکھا کہ پچھلے ڈیڑھ سال سے ہر طرح کی فسطائیت کے باوجود وہ ہمیں توڑنے میں ناکام رہے ہیں اور اب اس قسم کے اوچھے ہتھکنڈوں پر اتر آئے ہیں۔
مہربانو قریشی کا کہنا تھا کہ میرا اور میرے خاندان کا اللہ پر ایمان اٹوٹ ہے۔ وہ ہمیں اور پاکستان کو اس فسطائیت سے ضرور نکالے گا۔
اس حوالے سے انہوں نے ایک ویڈیو بیان بھی جاری کیا۔
تاہم اس واقعے کے دو گھنٹے بعد مہربانو قریشی نے اپنے سوشل میڈیا اکاؤنٹ پر ایک پوسٹ میں کہا کہ انکی بھابھی بازیاب ہوکر گھر پہنچ گئی ہیں اور انہوں نے انکی تصویر بھی جاری کی۔
تاہم پولیس ذرائع اور خاندانی ذرائع کی جانب سے ایسی کوئی خبر سامنے نہیں آئی کہ شاہ محمود قریشی کی بہو کو کن لوگوں نے اغواء کیا تھا۔
