FIFA Series: Pakistan Women's historic 0-8 victory over Turks and Caicos Islands-FIFA
پاکستان ویمنز فٹبال ٹیم نے فیفا سیریز میں شاندار کارکردگی کا مظاہرہ کرتے ہوئے تاریخ رقم کر دی، جب انہوں نے ترکس اینڈ کیکوس آئی لینڈز کو 0-8 سے شکست دے دی یہ کامیابی قومی ویمنز ٹیم کی تاریخ کی سب سے بڑی فتح ہے۔
میچ کے آغاز ہی سے پاکستان نے جارحانہ کھیل پیش کیا اور پہلے ہاف میں چار مختلف کھلاڑیوں نے گول کر کے ٹیم کو مضبوط برتری دلائی زحمینہ ملک نے پہلا گول اسکور کیا، جبکہ اقصیٰ مشتاق، لیلا بنارس اور مریم محمود نے بھی شاندار کھیل کا مظاہرہ کرتے ہوئے گیند کو جال میں پہنچایا۔
دوسرے ہاف میں بھی پاکستان کی برتری برقرار رہی نادیہ خان نے ہیڈر کے ذریعے پانچواں گول اسکور کیا، جبکہ اقصیٰ مشتاق نے ایک اور خوبصورت گول کر کے اسکور 0-6 کر دیا لیلا بنارس نے اپنا دوسرا گول بھی اسی ہاف میں کیا، اور میچ کے اختتام سے قبل اسرا خان نے 81ویں منٹ میں آخری گول کر کے فتح کو یادگار بنا دیا۔
اس کامیابی کے ساتھ پاکستان ویمنز ٹیم نے ستمبر 2022 میں مالدیپ کے خلاف 0-7 کی فتح کا ریکارڈ بھی توڑ دیا۔
پاکستان فٹبال فیڈریشن کے صدر محسن گیلانی نے ٹیم کی کارکردگی کو سراہتے ہوئے کھلاڑیوں اور کوچنگ اسٹاف کو مبارکباد دی۔
