اردو انٹرنیشنل (مانیٹرنگ ڈیسک) چارسدہ میں اخون ڈھیری کے علاقے میں دھماکا ہوا ہے، پولیس کے مطابق دھماکے کے مقام سے تباہ موٹرسائیکل اور انسانی اعضاء ملے ہیں، دھماکا خودکش تھا یا کچھ اور تحقیقات جاری ہیں۔
پولیس کا کہنا ہے کہ دھماکا موٹرسائیکل سوار شخص کے پاس دھماکا خیز مواد پھٹنے سے ہوا ہے۔
ڈی پی او مسعود احمد کا کہنا ہے کہ پولیس وین پر دھماکا نہیں ہوا، مزید تحقیقات جاری ہیں۔
انہوں نے بتایا ہے کہ واقعے میں ہلاک ہونے والا شخص موٹرسائیکل پر سوار تھا۔
دوسری جانب شمالی وزیرستان کے علاقے تبی میں واقع ایک گھر میں بارودی مواد کے دھماکے کے بعد چھت گرنے سے 2 بچے جاں بحق اور میاں بیوی زخمی ہو گئے۔
پولیس کے مطابق دھماکے کے بعد کمرے کی چھت گر گئی جس سے بچے جاں بحق ہوئے۔
واقعے میں جاں بحق ہونے والے بچوں کی عمریں 11 اور 12 سال تھیں۔
بچوں کی لاشیں اور زخمی ماں باپ کو اسپتال منتقل کردیا گیا ہے۔
پولیس گھر میں ہونے والے اس دھماکے سے متعلق مزید تفتیش کر رہی ہے۔
