پٹرول،ڈیزل کی قیمتوں کو آئیندہ 15 روز کے لئے برقرار رکھنے کا فیصلہ
فنانس ڈویژن کے نوٹیفکیشن کے مطابق حکومت نے ملک میں اگلے 15 دنوں تک پٹرول اور ڈیزل کی قیمتوں میں کوئی تبدیلی نہ کرنے کا فیصلہ کیا ہے۔
پاکستان ہر 15 دن میں پیٹرولیم کی قیمتوں پر نظرثانی کرتا ہے لیکن ملک کی آئل اینڈ گیس ریگولیٹری اتھارٹی (اوگرا) نے حکومت کو اگلے پندرہ دن تک قیمتیں برقرار رکھنے کی سفارش کی ہے۔
فنانس ڈویژن نے ایک نوٹیفکیشن میں کہا، “حکومت پاکستان نے یکم جنوری 2024 سے شروع ہونے والے پندرہ دن کے دوران پیٹرول اور ہائی اسپیڈ ڈیزل کی موجودہ قیمتیں برقرار رکھنے کا فیصلہ کیا ہے۔”
نوٹیفکیشن کے مطابق ایک لیٹر پٹرول 267.34 روپے جبکہ ہائی سپیڈ ڈیزل 276.21 روپے میں فروخت ہو گا۔
15 دسمبر کو حکومت نے پیٹرول کی قیمت میں 14 روپے اور ہائی اسپیڈ ڈیزل کی قیمت میں 13 روپے 50 پیسے فی لیٹر کمی کی تھی۔
وزارت خزانہ نے اس نظرثانی کی وجہ تیل کی بین الاقوامی قیمتوں میں کمی اور امریکی ڈالر کے مقابلے مقامی کرنسی کی مضبوطی کو قرار دیا تھا۔
