پیٹرول مہنگا ہونے سے پہلے یو اے ای میں ہجوم، پمپوں پر ایک گھنٹے تک انتظار

اردو انٹرنیشنل (مانیٹرنگ ڈیسک) خلیج ٹایٔمز کی خبر  کے مطابق متحدہ عرب امارات میں پیٹرول کی قیمتوں میں اضافے سے قبل شہریوں کی بڑی تعداد پمپوں کا رخ کرنے لگی، جس کے باعث مختلف علاقوں میں شدید رش دیکھنے میں آیا اور کئی مقامات پر انتظار کا دورانیہ 30 سے 60 منٹ تک پہنچ گیا۔

رپورٹس کے مطابق رات 8 بجے کے بعد صورتحال مزید سنگین ہو گئی، جہاں ال نہدہ، الورقہ اور شیخ محمد بن زید روڈ کے اطراف گاڑیوں کی طویل قطاریں لگ گئیں۔ بعض جگہوں پر یہ قطاریں سروس روڈز اور داخلی راستوں تک پھیل گئیں، جبکہ گوگل میپس پر بھی ٹریفک کی غیرمعمولی صورتحال واضح نظر آئی۔

شہریوں کا کہنا ہے کہ شام کے ابتدائی اوقات میں فیول بھرانے میں چند منٹ لگتے تھے، مگر رات گئے یہی وقت بڑھ کر ایک گھنٹے تک جا پہنچا۔ اس کے باوجود بڑی تعداد میں افراد قیمتوں میں اضافے سے پہلے ٹینک فل کروانے کو ترجیح دیتے رہے۔

عجمان کے رہائشی کے مطابق انہوں نے وقت سے پہلے پیٹرول بھرانے کی کوشش کی، جس کے تحت پہلی گاڑی میں فیول بھرنے میں صرف 10 سے 15 منٹ لگے، تاہم دوسری گاڑی کے لیے انہیں تقریباً آدھا گھنٹہ انتظار کرنا پڑا۔ ان کا کہنا تھا کہ اگرچہ بچت محدود ہے، لیکن 40 سے 60 درہم کی بچت بھی اہم محسوس ہوتی ہے۔

اعداد و شمار کے مطابق چھوٹی گاڑیوں میں ایک ٹینک بھرانے پر تقریباً 40 درہم تک جبکہ بڑی گاڑیوں میں 100 درہم سے زائد کی بچت ممکن ہے، جس کی وجہ سے شہری طویل انتظار کے باوجود پمپوں پر موجود رہے۔

ٹرانسپورٹ اور ڈرائیونگ سے وابستہ افراد کے لیے یہ صورتحال زیادہ اہم رہی۔ ایک ڈرائیور نے بتایا کہ روزانہ ایندھن خرچ ہونے کے باعث معمولی بچت بھی مجموعی طور پر بڑا فرق ڈالتی ہے، اسی لیے انہوں نے ایک گھنٹے تک انتظار کیا۔