غزہ میں محصور نہتے فلسطینیوں پر پچھلے 15 مہینوں سے جاری قتل وغارت کا بازار روک دینے کی عالمی کوششیں بالاخر کسی نتیجے پر پہنچ گئی ہیں۔ یہ کہنا فی الحال مشکل ہے کہ کیا یہ مجوزہ جنگ بندی منصوبہ مقبوضہ فلسطینی علاقوں میں مکمل جنگ کے خاتمے کا سبب بنے گا یا نہیں لیکن فی الحال کم ازکم اتنا تو ہوگا کہ جنگ کے مارے فلسطینی کچھ عرصے کے لئے ہی سہی اسرائیل کی وحشیانہ بمباری سے محفوط اپنے ہزارں پیاروں کی موت کا ماتم اور زخمیوں کی دیکھ بھال کرسکیں گے۔ غزہ میں اب تک اسرائیلی بمباری سے مارے جانے والوں کی تعداد 47 ہزار کے لگ بھگ ہے جبکہ ہزاروں مزید ملبے تلے دبے ہیں جن کی تعداد کا کوئی اندازہ نہیں۔
بدھ کے روز دوحہ میں قطر ، مصر اور امریکہ کی ثالثی میں تین مراحل پر مشتمل ایک جنگ بندی معاہدہ طے پایا ہے، جس کے مطابق پہلے مرحلے میں حماس اور اسرائیل کے درمیان لڑائی روکنے اور قیدیوں کے تبادلے کے ساتھ ساتھ، غزہ کے لوگوں کو امداد کی فراہمی اور اس جنگ زدہ پٹی سے اسرائیلی افواج کا جزوی انخلا شامل ہے۔ تاہم اس معاہدے کی کامیابی اس امر پہ منحصر ہے کہ اسرائیل اس معاہدے کی پاسداری کے لیے کس قدر سنجیدہ ہوگا؟
افسوسناک بات یہ ہے کہ جنگ بندی کے اعلان کے باوجود بھی ، جوکل سے نافذ ہوگی ، اسرائیل کی غزہ میں بربریت جاری ہے اور بدھ کے بعد سے اب تک مزید دو سو کے لگ بھگ فلسطینی مارے گئے ہیں ۔
اس سے قبل ، اسرائیلی وزیراعظم نیتن یاہو نے انتہائی تفاخرانہ انداز میں یہ کہا تھا کہ ، حماس کے خاتمے تک یہ لڑائی جاری رہے گی۔ ظاہر ہے ایسا تو نہیں ہوا اور اس کے بجائے اسرائیل کو فلسطینی مسلح گروہ کے ساتھ جنگ بندی کے معاہدے پر ہی دستخط کرنا پڑے ہیں ۔ اس سے یہ تو ثابت ہوتا ہے کہ جدید ترین امریکی ہتھیاروں سے لیس بظاہر دنیا کی بہترین فوج بھی مقبوضہ فلسطینی عوام کے عزم کو نہیں توڑ سکی ۔ انہوں نے ہزاروں جانوں کی قربانی سہہ لی مگر اپنی سر زمین کو نہیں چھوڑا۔
Photo-AFP
ماہرین کی رائے ہے کہ یہ جنگ بندی معاہدہ کامیاب ہوجائے گا اور ناصرف جنگ بندی ہوگی بلکہ غزہ میں فلسطینیوں کو فوری طورپر ضروری امداد بھی فراہم کی جائے گی تاہم دنیا کو اس محصور اور مختصر خطے پر اسرائیلی بربریت کو فراموش نہیں کرنا چاہیئے جہاں ہزاروں بے گناہ قتل کئے گئے۔ جہاں اسرائیل کی وحشی فوج ناصرف ان ہزاروں اموات کی ذمہ ہے بلکہ فلسطینی قیدیوں کی عصمت دری، بدترین بدسلوکی، اس سرد ترین موسم میں سینکڑوں بچوں کی ٹھٹھرتی موت ، مصنوعی قحط اور حتیٰ کہ پینے کے پانی تک فراہمی روکنے جیسے جنگی جرائم کی مرتکب ہوئی ۔ اب ان تمام جنگی جرائم کی تحقیقات ہونی چائیں اور مجرموں کو کٹہرے میں لایا جانا چاہیے۔
انٹرنیشنل کریمنل کورٹ اور بین الاقوامی عدالت انصاف میں اسرائیل کے خلاف نسل کشی کے مقدمے کو بھی منطقی انجام تک پہنچایا جانا چاہیے تاکہ نیتن یاہو اور یوآوگیلانت جیسے جنگی مجرم کبھی دوبارہ فلسطینی عوام کے خلاف ایسے بھانک جرائم نہ کرسکیں۔
اس جنگ بندی کے بعد بہت سے منصوبے پیش کیے جارہے ہیں تاہم حقیقت یہی ہے کہ مسئلہ فلسطین کا واحد اور طویل المدتی حل 1967 کی سرحدوں پر قائم ایک آزاد اور خود مختار فلسطینی ریاست کا قیام ہے جس کے قیام کے لیے اسرائیل کو غیر مشروط طور پر تمام مقبوضہ فلسطینی علاقوں کو خالی کرنا ہوگا۔
اس کے علاوہ غزہ میں ہونے والی نسل کشی نے فلسطینی اتھارٹی کی عالمی سطح پرفلسطین کی مؤثر وکالت میں ناکامی اور بے بسی کو بھی ظاہر کیا ہے۔ فلسطینی عوام کو اس اتھارٹی کا احتساب بھی کرنا ہوگا۔
سب سے پہلے فلسطینی رہنماؤں کو فلسطین میں اتحاد و یکجہتی کی تمام کوششوں کی حمایت کرنا ہوگی اور مغربی کنارے میں موجود فلسطینی تحریک آزادی اور حماس اور دیگر تنظیموں کوفی الفور ایک متحد فرنٹ قائم کرنا ہوگا تاکہ وہ اسرائیلی قبضے اور بربریت کا موثر مقابلہ کرسکیں ۔ یہ طے ہے کہ اگر اسرائیل اس جنگ بندی پر قائم نہیں رہتا تو بھی اسے امریکہ کی مکمل حمایت ملتی رہے گی ۔ ایسی صورت میں فلسطینی سوائے مزاحمت کے اور کچھ نہیں کرسکتے مگر اس مزاحمت کو بامعنی بنانے کے لئے فلسطنیوں کا اتحاد ایک لازمی امر ہے۔
معصومہ زہرا
ڈان سے ماخوذ
