بنی گالہ کی رہائش گاہ بشریٰ بی بی کے لئے سب جیل قرار
سابق وزیراعظم عمران خان کی اہلیہ بشریٰ بی بی کو اڈیالہ جیل سے بنی گالہ منتقل کردیا گیا ہے جہاں ان کے شوہر کی رہائش گاہ کو حکام نے بطورِ سب جیل قرار دے دیا ہے۔
بشریٰ بی بی کو 31 جنوری 2024 کو احتساب عدالت نے توشہ خانہ کرپشن کیس میں ان کے شوہر عمران خان سمیت 14 سال قید کی سزا سنائی تھی اور دونوں کو 10 سال کے لیے کسی بھی عوامی عہدے کے لیے نااہل قرار دیا گیا تھا۔ عمران خان اور بشریٰ بی بی پر یہ الزام تھا کہ انہوں نے توشہ خانہ سے حاصل ہونے والے تحائف کو فروخت کیا تھا اور اس سے حاصل ہونے والی آمدن کو اثاثوں میں ظاہر نہیں کیا.
بشریٰ بی بی: بنی گالہ میں قائم کردہ سب جیل میں قید عمران خان کی اہلیہ کون ہیں؟
بشریٰ بی بی توشہ خانہ کیس کا فیصلہ سناتے وقت موجود نہیں تھی اور کیس کا فیصلہ سنائے جانے کے بعد انہوں نے اڈیالہ جیل پہنچ کر گرفتاری دے دی۔ تاہم، جیل حکام نے پنجاب اور وفاقی حکومتوں کی درخواستوں کے بعد انہیں بنی گالہ منتقل کرنے کا فیصلہ کیا، جہاں پر ان کے شوہر عمران خان کے گھر کو ان کے لئے سب جیل قرار دے دیا گیا ہے۔
