اردو انٹرنیشنل (اسپورٹس ویب ڈیسک) تفصیلات کے مطابق روس کے وزیر کھیل میخائل ڈیگٹیاریف نے بین الاقوامی اولمپک کمیٹی (آئی او سی) سے تعلقات بہتر کرنے اور جاری تنازعات ختم کرنے کی اپیل کی ہے۔ یہ مطالبہ اس وقت سامنے آیا جب روس کی نیشنل اولمپک کمیٹی کے سربراہ، اسٹینسلاو پوزدنیاکوف، نے اپنے عہدے سے استعفیٰ دیا۔
کریملن کے صدر ولادیمیر پوتن کی موجودگی میں کھیلوں کے ایک اہم اجلاس میں ڈیگٹیاریف نے اس بات پر زور دیا کہ روسی کھیلوں کو موجودہ “جغرافیائی سیاسی چیلنجز” کا سامنا ہے، اور ان مسائل کا حل نکالنے کی ضرورت ہے۔
ماضی میں روس اور سوویت یونین اولمپکس میں کامیاب رہے ہیں، لیکن یوکرین پر حملے کے بعد روس پر 2024 کے پیرس اولمپکس میں ٹیم کے طور پر شرکت پر پابندی لگا دی گئی ہے۔ آئی اس سی نے کہا تھا کہ چند روسی ایتھلیٹس “غیرجانبدار” کے طور پر حصہ لے سکتے ہیں، مگر ان کی جانچ پڑتال کی جائے گی تاکہ یہ یقینی بنایا جا سکے کہ انہوں نے یوکرین پر حملے کی حمایت نہیں کی۔
روسی حکام نے اس پابندی کو غیرمنصفانہ اور امتیازی قرار دیتے ہوئے اس کی مذمت کی ہے، خاص طور پر اس لیے کہ یہ پابندی بیلاروس کے ایتھلیٹس پر بھی لاگو ہوتی ہے، جو روس کا اتحادی ملک ہے۔