اردو انٹرنیشنل (اسپورٹس ڈیسک) تفصیلات کے مطابق ٹی ٹوئنٹی ورلڈ کپ 2024 سے قبل پاکستانی ٹیم آج دو گروپس میں لندن سے امریکہ کے شہر ڈیلاس کے لیے روانہ ہونے والی ہے۔
ٹیم کا ایک گروپ کھلاڑی اور انتظامیہ سمیت 19 ارکان پر مشتمل ہوگا جبکہ دوسرے گروپ میں 9 ارکان ہوں گے۔
اپنے دورے کے دوران پاکستان نے آئرلینڈ اور انگلینڈ کے خلاف ٹی ٹوئنٹی سیریز کھیلی۔
تین میچوں کی سیریز کے پہلے ٹی ٹوئنٹی میں آئرلینڈ نے پاکستان کو پانچ وکٹوں سے شکست دی تھی جب کہ پاکستان نے باقی دو میچز، دوسرا میچ 7 وکٹوں سے اور آخری میچ 6 وکٹوں سے جیتا تھا۔
دوسری جانب پاکستان کی انگلینڈ کے ساتھ چار میچوں کی سیریز کے دوران دو میچز بارش کے باعث منسوخ ہو گئے تھے۔
ہفتہ 25 مئی کو کھیلے گئے سیریز کے دوسرے میچ میں انگلینڈ نے پاکستان کو 23 رنز سے شکست دی تھی اسی طرح جمعرات کو ہونے والے فائنل میچ میں انگلینڈ نے ایک بار پھر برتری حاصل کی اور 7 وکٹوں سے کامیابی حاصل کی۔
پاکستانی ٹیم ٹی ٹوئنٹی ورلڈ کپ میں اپنا پہلا میچ جمعرات 6 جون کو امریکا کے شہر ڈیلاس میں کھیلے گی۔
پاکستان ٹی ٹوئنٹی ورلڈ کپ شیڈول
6 جون: پاکستان بمقابلہ امریکہ، ڈیلاس
9 جون: پاکستان بمقابلہ انڈیا، نیویارک
11 جون: پاکستان بمقابلہ کینیڈا، نیویارک
16 جون: پاکستان بمقابلہ آئرلینڈ، لاڈر ہل