گوادر میں نامعلوم مسلح افراد کی فائرنگ سے 7 افراد قتل
اردو انٹرنیشنل (مانیٹرنگ ڈیسک) بلوچستان کے ضلع گوادر میں نامعلوم مسلح افراد کے حملے میں پنجاب سے تعلق رکھنے والے 7 افراد قتل ہو گئے ہیں۔
مقامی پولیس کے مطابق یہ واقعہ گوادر کے علاقے سربندر میں پیش آیا ہے اور اس میں ایک شخص زخمی بھی ہوا۔
پولیس کا کہنا ہے کہ ہلاک اور زخمی ہونے والے افراد حجام کا کام کرتے تھے اور ان کا تعلق پنجاب کے ضلع خانیوال سے تھا۔
گوادر پولیس کے ایس ایچ او محسن بلوچ بتایا کہ بدھ کی شب تین بجے نامعلوم مسلح افراد نے سربندر میں ایک کوارٹر میں رہائش پذیر آٹھ افراد پر فائرنگ کر دی جس سے سات افراد قتل جبکہ ایک شخص زخمی ہو گیا۔
پولیس کے مطابق ہلاک ہونے والے افراد کو پوسٹ مارٹم جبکہ زخمی شخص کو طبی امداد کی فراہمی کے لیے گوادر کے ہسپتال منتقل کیا گیا ہے۔
اس واقعے کی ذمہ داری تاحال کسی نے قبول نہیں کی ہے اور ایس ایچ او کا کہنا ہے کہ اس واقعے کی مختلف پہلوؤں سے تحقیقات کا سلسلہ جاری ہے۔
