گیس فیلڈ پر وار، ٹرمپ کا الٹی میٹم: ایران نے قدم بڑھایا تو سخت انجام ہوگا

اردو انٹرنیشنل (مانیٹرنگ ڈیسک) ایکسپریس ٹریبیون کی خبر کے مطابق امریکا اور اسرائیل کی جانب سے ایران کے خلاف جاری جنگ میں اس وقت شدت آگئی جب ایران کے اہم گیس منصوبے ساؤتھ پارس کو نشانہ بنایا گیا، جس کے بعد خطے میں کشیدگی نئی سطح پر پہنچ گئی اور عالمی توانائی منڈیوں میں بے چینی بڑھ گئی۔

امریکی صدر ڈونلڈ ٹرمپ نے اس صورتحال پر ردعمل دیتے ہوئے کہا کہ اسرائیل نے ایران کی گیس تنصیب پر حملہ کیا، تاہم اگر ایران نے اس کے جواب میں مزید کارروائی کی، خصوصاً قطر کے خلاف، تو امریکا سخت اور بھرپور ردعمل دے گا۔ ان کا کہنا تھا کہ ایسی صورت میں ساؤتھ پارس گیس فیلڈ کو مکمل طور پر تباہ کیا جا سکتا ہے۔

ٹرمپ نے یہ بھی واضح کیا کہ امریکا کو اس مخصوص حملے کی پیشگی اطلاع نہیں تھی اور نہ ہی قطر اس کارروائی میں شامل تھا، تاہم انہوں نے ایران کے اقدامات کو غیر منصفانہ قرار دیا۔

حملے کے ردعمل میں ایران نے خلیجی ممالک کی توانائی تنصیبات کو نشانہ بنانے کی دھمکی دی اور قطر و سعودی عرب پر میزائل حملے کیے گئے۔ 

سعودی عرب نے دعویٰ کیا ہے کہ اس کے فضائی دفاعی نظام نے ریاض کی جانب آنے والے چار بیلسٹک میزائل اور ایک ڈرون تباہ کر دیا، جبکہ متحدہ عرب امارات میں بھی متعدد حملے ناکام بنائے گئے، تاہم بعض مقامات پر ملبہ گرنے سے نقصان ہوا اور گیس تنصیبات متاثر ہوئیں۔