US Air Force tanker plane crashes in Iraq, 4 personnel killed, 2 missing
اردو انٹرنیشنل (مانیٹرنگ ڈیسک) واشنگٹن پوسٹ کی خبر کے مطابق امریکا اور ایران کے درمیان جاری کشیدگی اور عسکری کارروائیوں کے دوران عراق میں امریکی فضائیہ کا ایک کے سی 135 اسٹریٹو ٹینکر طیارہ حادثے کا شکار ہو گیا جس کے نتیجے میں چار امریکی فوجی ہلاک جبکہ دو اہلکار لاپتہ ہو گئے ہیں۔ امریکی سینٹرل کمانڈ کے مطابق لاپتہ اہلکاروں کی تلاش کیلئے ریسکیو کارروائیاں جاری ہیں۔
امریکی فوجی حکام کے مطابق یہ واقعہ مغربی عراق کی فضائی حدود میں پیش آیا جہاں دو امریکی ری فیولنگ طیارے ایک مشن کے دوران پرواز کر رہے تھے۔ ابتدائی معلومات کے مطابق دونوں طیاروں کے درمیان فضا میں حادثہ پیش آیا جس کے بعد ایک طیارہ گر کر تباہ ہو گیا جبکہ دوسرا طیارہ بحفاظت لینڈ کرنے میں کامیاب رہا۔
سینٹرل کمانڈ نے اپنے بیان میں کہا ہے کہ حادثے کی وجوہات جاننے کیلئے تحقیقات شروع کر دی گئی ہیں اور ابتدائی طور پر یہ واضح کیا گیا ہے کہ یہ واقعہ دشمن کی فائرنگ یا کسی حملے کا نتیجہ نہیں تھا۔ ہلاک ہونے والے فوجیوں کی شناخت فی الحال ظاہر نہیں کی گئی کیونکہ پہلے ان کے اہل خانہ کو مطلع کیا جانا ضروری ہے۔
کے سی 135 اسٹریٹو ٹینکر امریکی فضائیہ کا اہم طیارہ ہے جو دورانِ پرواز جنگی طیاروں کو ایندھن فراہم کرتا ہے۔ اس میں عام طور پر پائلٹ، شریک پائلٹ اور بوم آپریٹر سمیت کم از کم تین افراد پر مشتمل عملہ ہوتا ہے، تاہم بعض مشنز میں اضافی عملہ بھی موجود ہوتا ہے۔
اسی روز امریکی بحریہ نے یہ بھی بتایا کہ طیارہ بردار بحری جہاز یو ایس ایس جیرالڈ آر فورڈ پر ایک حصے میں آگ لگنے کا واقعہ پیش آیا جس کے نتیجے میں دو ملاح زخمی ہوئے تاہم ان کی حالت خطرے سے باہر بتائی گئی ہے۔
امریکی حکام کے مطابق ایران کے خلاف جاری جنگ کے آغاز کے بعد سے اب تک کم از کم سات امریکی فوجی دشمن حملوں میں ہلاک ہو چکے ہیں۔
