“ایٹمی ماحول میں جنگ کی کوئی گنجائش نہیں” آرمی چیف فیلڈ مارشل عاصم منیر کی بھارت کو تنبیہ
اردو انٹرنیشنل (مانیٹرنگ ڈیسک) پاکستان کے آرمی چیف فیلڈ مارشل عاصم منیر نے ہفتے کے روز بھارت کو خبردار کیا کہ “ایٹمی ماحول میں جنگ کی کوئی گنجائش نہیں۔انہوں نے مئی میں پڑوسی ملک کے ساتھ ہونے والے تنازع میں پاکستان کی “واضح فتح” کو سراہا۔
پاکستان ملٹری اکیڈمی (PMA) کاکول میں پاسنگ آؤٹ پریڈ سے خطاب کرتے ہوئے آرمی چیف نے کہا”میں بھارت کی عسکری قیادت کو مشورہ دیتا ہوں اور سختی سے خبردار کرتا ہوں کہ ایٹمی ماحول میں جنگ کی کوئی گنجائش نہیں۔
انہوں نے نئی دہلی سے مطالبہ کیا کہ وہ بنیادی تنازعات کو بین الاقوامی اصولوں کے مطابق حل کرے۔”ہم کبھی خوفزدہ یا دباؤ میں نہیں آئیں گے۔ آپ کی دھمکیوں کا ہم ہر چھوٹی سے چھوٹی اشتعال انگیزی پر بھی فیصلہ کن جواب دیں گے، بغیر کسی جھجھک کے۔”
آرمی چیف نے کہا کہ پاکستان کے قیام سے لے کر آج تک مسلح افواج نے عوام کی مکمل حمایت سے ملک کی بیرونی اور اندرونی سرحدوں کا دفاع غیر متزلزل عزم، ایمان اور فخر کے ساتھ کیا ہے۔
انہوں نے کہا پاکستانی افواج کے اسی جذبے اور عزم کا تازہ مظاہرہ ’معرکہ حق‘ اور ’آپریشن بنیان مرصوص‘ کے دوران ہوا، جس نے قوم کے اعتماد کو مزید مضبوط کیا۔ افواجِ پاکستان نے غیر معمولی پیشہ ورانہ مہارت کے ساتھ تمام خطرات کو ناکام بنایا۔
عاصم منیر نے مزید کہا جدید رافائل طیاروں کو مار گرایا گیا، متعدد بھارتی فوجی اڈے بشمول ایس 400 کو نشانہ بنایا گیا، اور ملٹی ڈومین وارفیئر کی صلاحیتوں کا مظاہرہ کیا گیا — پاکستان نے اپنی دفاعی صلاحیت اور عزم دونوں ثابت کر دیے۔
انہوں نے کہا کہ عمر، جنس، نسل یا عقیدے سے قطع نظر عوام ایک فولادی دیوار کی طرح متحد کھڑے رہے۔ اس اتحاد نے حب الوطنی اور قومی جوش و خروش کی ایک نئی روح پھونک دی ہے جو پورے پاکستان میں پھیل چکی ہے۔
فیلڈ مارشل نے کہا ہماری اجتماعی کامیابی نے ہماری ماضی کی فتوحات کی یادوں کو تازہ کر دیا ہے۔ پاکستان ایک بار پھر ایک چالاک دشمن پر غالب آیا ایک ایسا دشمن جو اسٹریٹجک اندھے پن، سادہ لوحی، اور اپنی گمراہ کن بالادستی کے زعم میں مبتلا ہے۔”
انہوں نے مزید کہا بھارت کا الزام تراشی کا شوق، غیر جانبدار تحقیقات سے گریز، اور خود ساختہ شواہد پر انحصار یہ ظاہر کرتا ہے کہ موجودہ حکومت نے دہشت گردی کو اپنے سیاسی مقاصد کے لیے استعمال کیا۔
آرمی چیف نے کہا پاکستان نے ایک بڑی فوجی طاقت پر واضح اور جائز فتح حاصل کر کے نہ صرف اپنی عوام بلکہ بین الاقوامی برادری کی بھی عزت حاصل کی۔ اندرونی طور پر اس نے قوم کو مزید متحد کیا اور یہ یقین پختہ کیا کہ افواجِ پاکستان ریاست کی خودمختاری اور علاقائی سالمیت کے محافظ ہیں۔
خطاب کے آغاز میں آرمی چیف نے پاس آؤٹ ہونے والے مرد و خاتون کیڈٹس کوپیشہ ورانہ مہارت اور نظم و ضبط کے شاندار مظاہرے پر مبارکباد دی۔انہوں نے دوست ممالک ملائشیا، نیپال، فلسطین، قطر، سری لنکا، بنگلہ دیش، یمن، مالی، مالدیپ اور نائیجیریا سے تعلق رکھنے والے کیڈٹس کو بھی تربیت مکمل کرنے پر سراہا۔
یہ لمحہ آپ کے لیے اور ہم سب کے لیے فخر کا باعث ہے، جو عسکری تعاون اور بین الاقوامی دوستی کے مضبوط رشتے کی علامت ہے۔آخر میں انہوں نے کہا کہپاکستان ملٹری اکیڈمی کا کردار ہمیشہ عسکری بہترین کارکردگی کی بنیاد رہا ہے، اور آج کا معیار بھی اسی روایت کا عکاس ہے۔
