مصر میں موجود سوڈانی وزیر اچانک بے ہوشی کے بعد چل بسے
اردو انٹرنیشنل (مانیٹرنگ ڈیسک) سوڈان کے وزیر تعلیم محمود سر الختم جمعے کی شام مصر کے دار الحکومت قاہرہ میں اچانک انتقال کر گئے۔
ذرائع نے العربیہ کو بتایا کہ سوڈانی وزیر قاہرہ کے جنوب میں الجیزہ میں واقع ایک ہوٹل میں موجودگی کے دوران اچانک بے ہوش ہو کر گر پڑے۔ معائنے پر معلوم ہوا کہ وہ فوت ہو چکے ہیں جس کے بعد ان کی میت ہسپتال منتقل کر دی گئی۔
العربیہ ڈاٹ نیٹ کی معلومات کے مطابق سوڈانی وزیر ذیابیطس کے مریض تھے۔ وہ علاج کے لیے اپنی اہلیہ کے ہمراہ قاہرہ پہنچے تھے۔
ڈاکٹروں کے مطابق الختم کی موت دل کے سنگین مسئلے کی وجہ سے ہوئی۔
قاہرہ میں سوڈان کے سفارت خانے کو وزیر کی وفات سے مطلع کر دیا گیا،اس سلسلے میں ضروری کارروائی کے بعد استغاثہ نے تحقیقات کا آغاز کر دیا۔
واضح رہے کہ 2022 میں بھی جنوبی سوڈان کے آبی وزیر مصر میں انتقال کرگئے تھے.
