ٹینس: اٹلی اور امریکہ یونائیٹڈ کپ کے کوارٹر فائنل میں پہنچ گئے

اردو انٹرنیشنل (اسپورٹس ویب ڈیسک) تفصیلات کے مطابق امریکہ اور اٹلی نے یونائیٹڈ کپ میں شاندار کارکردگی کا مظاہرہ کرتے ہوئے بالترتیب کروشیا اور فرانس کو 3-0 سے شکست دی اور کوارٹر فائنل میں اپنی جگہ بنالی۔

ٹیلر فرٹز نے بورنا کوریک کو 6-3، 6-2 سے شکست دی، جس سے امریکہ نے گروپ اے میں سرفہرست پوزیشن حاصل کی اور اب کوارٹر فائنل میں ان کا مقابلہ چین کے ساتھ ہوگا۔
خواتین کے سنگلز میں کوکو گاف نے ڈونا ویکک کو 6-4، 6-2 سے ہرایا۔ گاف نے ویکک سے اپنی شکست کا بدلہ لیا جو انہوں نے پیرس اولمپکس میں کھائی تھی۔
فرٹز اور گاف نے مکسڈ ڈبلز میں بھی زبردست کارکردگی دکھائی اور اپنی ٹیم کو مزید مضبوط کیا۔

اس کے علاوہ اٹلی کے فلاویو کوبولی نے فرانس کے یوگو ہمبرٹ کو ایک سخت مقابلے میں 3-6، 7-6 (8)، 6-2 سے شکست دی۔ کوبولی نے ایک میچ پوائنٹ بھی بچایا اور بہترین کھیل کا مظاہرہ کیا۔

یوگو ہمبرٹ نے دوسرے سیٹ میں شاندار آغاز کرتے ہوئے اپنے پہلے 17 سروس پوائنٹس جیتے اور 6-3، 5-4 کی برتری حاصل کر لی، لیکن اٹلی کے فلاویو کوبولی کی زبردست واپسی نے بازی پلٹ دی۔ کوبولی نے کہا کہ یہ سیزن کی شاندار شروعات تھی، اور ہمبرٹ کے خلاف جیتنا مشکل مگر اہم تھا۔

اٹلی کی جیسمین پاولینی نے خواتین کے سنگلز مقابلے میں کلو پاکیٹ کو صرف ایک گھنٹے میں 6-0، 6-2 سے شکست دی۔ پاولینی، جو 2024 رولینڈ گیروس اور ومبلڈن کی فائنلسٹ رہی ہیں، نے پاکیٹ کے خلاف اپنی پہلی جیت سمیٹی۔

یہ جیت اٹلی کی اس سال کی شاندار فارم کو ظاہر کرتی ہے اور ٹیم کے لیے ایک بڑی کامیابی ہے۔