PDMA predicts heavy rains in Punjab in the next 24 hours
پنجاب میں قدرتی آفات سے نمٹنے والے ادارے (پی ڈی ایم اے) نے خبردار کیا ہے کہ آئندہ 24 گھنٹوں کے دوران پنجاب کے بیشتر اضلاع میں شدید طوفانی بارشیں متوقع ہیں۔ ادارے کے مطابق، رواں مون سون سیزن کا دسویں اسپیل 9 ستمبر تک جاری رہے گا۔
ترجمان پی ڈی ایم اے کے مطابق راولپنڈی، مری، گلیات، اٹک، چکوال، جہلم، گوجرانوالہ، لاہور، گجرات، سیالکوٹ، نارووال، حافظ آباد، منڈی بہاؤالدین، اوکاڑہ، ساہیوال، قصور، جھنگ، سرگودھا اور میانوالی میں بارشوں کا امکان ہے، جبکہ ڈیرہ غازی خان، ملتان اور راجن پور میں بھی بارش برسنے کی پیشگوئی کی گئی ہے۔
مزید برآں، ڈیرہ غازی خان کے رودکوہی علاقوں میں 9 ستمبر تک فلیش فلڈنگ (اچانک سیلاب) کے خطرے کا خدشہ ظاہر کیا گیا ہے۔
اعداد و شمار کے مطابق گزشتہ 24 گھنٹوں کے دوران پنجاب میں سب سے زیادہ بارش جہلم میں ریکارڈ کی گئی جو 96 ملی میٹر تھی۔ جھنگ میں 77 ملی میٹر، نورپور تھل میں 70 ملی میٹر، خانیوال میں 55 ملی میٹر، لیہ میں 42 ملی میٹر، راولپنڈی میں 34 ملی میٹر، ساہیوال میں 32 ملی میٹر، منگلا میں 29 ملی میٹر، چکوال میں 26 ملی میٹر، ڈیرہ غازی خان میں 21 ملی میٹر، فیصل آباد میں 20 ملی میٹر اور اوکاڑہ میں 17 ملی میٹر بارش ریکارڈ ہوئی۔
