پاکستان ویمن ٹیم ٹی ٹوئنٹی ایشیا کپ میں شرکت کے لیے کل سری لنکا روانہ ہوگی
اردو انٹرنیشنل (اسپورٹس ڈیسک )تفصیلات کے مطابق پاکستان ویمن کرکٹ ٹیم آئندہ اے سی سی ویمنز ٹی ٹوئنٹی ایشیا کپ میں شرکت کے لیے کل روانہ ہوگی جو کہ 19 سے 28 جولائی تک کھیلا جائے گا۔
پاکستانی ٹیم کل کولمبو پہنچے گی جہاں سے وہ ایشیا کپ کے میزبان شہر دمبولا جائے گی۔
ندا ڈار کی قیادت میں پاکستان کو گروپ اے میں روایتی حریف بھارت کے ساتھ ساتھ نیپال اور یو اے ای کے ساتھ رکھا گیا ہے جبکہ گروپ بی میں سری لنکا، بنگلہ دیش، تھائی لینڈ اور ملائیشیا شامل ہیں ہر گروپ کی دو ٹاپ ٹیمیں 26 جولائی کو سیمی فائنل کھیلیں گی۔
ٹورنامنٹ کے افتتاحی دن پاکستان کا مقابلہ 19 جولائی کو بھارت سے ہوگا جبکہ نیپال اور متحدہ عرب امارات کے خلاف اس کے میچ بالترتیب 21 اور 23 جولائی کو ہوں گے۔
نئے کوچنگ اسٹاف کے تحت یہ پاکستانی خواتین کی پہلی اسائنمنٹ ہوگی جس میں ہیڈ کوچ محمد وسیم، اسسٹنٹ کوچ جنید خان اور اسپن بولنگ کوچ عبدالرحمان شامل ہیں۔
کراچی کے حنیف محمد ہائی پرفارمنس سینٹر میں آج ختم ہونے والے تربیتی کیمپ میں خواتین کی ٹیم نے سخت ٹریننگ کی۔
ویمنز ٹی ٹوئنٹی ایشیا کپ ک پاکستانی اسکواڈ
ندا ڈار (کپتان)، عالیہ ریاض، ڈیانا بیگ، فاطمہ ثناء، گل فیروزہ، ارم جاوید، منیبہ علی، ناجیہ علوی، نشرہ سندھو، عمائمہ سہیل، سعدیہ اقبال، سدرہ امین، سیدہ عروب شاہ، تسمیہ رباب اور طوبہ حسن
