وزیراعلیٰ خیبر پختونخوا علی امین گنڈا پور کے ناقابل ضمانت وارنٹ گرفتاری جاری
اردو انٹرنیشنل (مانیٹرنگ ڈیسک) اے ٹی سی کے جج طاہرعباس سپرا نے پیر کو کے پی کے وزیراعلیٰ علی امین گنڈا پور اور پی ٹی آئی کے مقامی رہنما عامر مسعود مغل کے کیس کی سماعت میں شرکت نہ کرنے پر ان کے ناقابل ضمانت وارنٹ گرفتاری جاری کردیے۔
علیمہ خان اور عظمیٰ خان کا ایک روزہ جسمانی ریمانڈ منظور
جج طاہر عباس سپرا نے کوہسار پولیس کو ڈی چوک تشدد کے سلسلے میں عمران خان کی بہنوں علیمہ اور عظمیٰ کا ایک روزہ جسمانی ریمانڈ بھی منظور کیا اور اسد قیصر کے بھائی عدنان خان کے جسمانی ریمانڈ میں سات دن کی توسیع کردی۔
قبل ازیں سماعت میں پی ٹی آئی کے وکیل نیاز اللہ خان نیازی نے دلائل دیتے ہوئے کہا کہ پولیس نے عمران کی بہنوں کو 4 اکتوبر کو گرفتار کیا تھا، جب انہیں عدالت میں پیش کیا گیا تو 2 دن کے وقفے کے بعد ایف آئی آر کی کاپی فراہم کی، اس لیے گرفتاری خود ہی غیر قانونی ہوجاتی ہے۔
انہوں نے یہ بھی دلیل دی کہ انسداد دہشت گردی ایکٹ کی دفعہ 7 نعرے لگانے پر لگائی گئی۔
تاہم جج نے ایک دن کا ریمانڈ منظور کیا جب پراسیکیوٹر نے عدالت کو بتایا کہ ریمانڈ کسی ریکوری کے لیے نہیں بلکہ “تکنیکی پوچھ گچھ” کے لیے مانگا گیا ہے۔
دریں اثناء جج طاہرعباس سپرا نے ہنگامہ آرائی کیس میں پی ٹی آئی رہنما اعظم خان سواتی کو تین دن اور کے پی اسمبلی کے اراکین اسمبلی انور زیب اور ملک لیاقت کو سات دن کے لیے جسمانی ریمانڈ پر پولیس کے حوالے کر دیا۔
