ویانا میں بڑی سفارتی پیش رفت: شہباز شریف کی چانسلر اسٹوکر سے ملاقات، دوطرفہ روابط مزید مضبوط کرنے کا اعلان

اردو انٹرنیشنل (مانیٹرنگ ڈیسک ڈان نیوز کی خبر کے مطابق وزیراعظم محمد شہباز شریف کا آسٹریا کا تاریخی دورہ تین دہائیوں بعد اعلیٰ سطحی ملاقات کے طور پر سامنے آیا ہے، جس کے دوران پاکستان اور آسٹریا نے اقتصادی، تجارتی اور تعلیمی تعاون سمیت مختلف شعبوں میں تعلقات کو مضبوط بنانے پر اتفاق کیا۔ یہ دورہ پاکستان–آسٹریا سفارتی تعلقات کی 70ویں سالگرہ کے موقع پر ہوا، جسے دونوں ممالک کے لیے سنگِ میل قرار دیا جا رہا ہے۔

وزیراعظم شہباز شریف اور آسٹریا کے چانسلر کرسچین اسٹوکر کے درمیان پہلے محدود سطح کی ملاقات ہوئی، جس کے بعد وفود کی سطح پر مذاکرات کیے گئے۔ ملاقات میں دونوں رہنماؤں نے دوستانہ تعلقات کو یاد کرتے ہوئے کہا کہ زیر غور مفاہمتی یادداشتیں جلد حتمی شکل دی جائیں گی تاکہ تعاون کے نئے منصوبوں پر عملی پیش رفت ممکن ہو سکے۔ 

وزیراعظم نے سوشل میڈیا پر اپنے بیان میں کہا کہ میرا آسٹریا کا دورہ خصوصی اہمیت رکھتا ہے کیونکہ تین دہائیوں کے بعد یہ اعلیٰ سطحی دورہ ہے اور پاکستان–آسٹریا تعلقات کی 70ویں سالگرہ کے موقع پر ہو رہا ہے۔

وزیراعظم نے ویانا میں پاکستان-آسٹریا بزنس راؤنڈ ٹیبل سے خطاب کرتے ہوئے کہا کہ پاکستان غیر قانونی امیگریشن کے خلاف ہے اور یورپی شراکت داروں کے ساتھ مل کر اسے روکنے کے لیے عملی اقدامات کر رہا ہے۔ انہوں نے آسٹریا کو یقین دلایا کہ پاکستان ماہر افرادی قوت فراہم کرے گا اور یہ بین الاقوامی معیار کی سرٹیفکیشن کے مطابق ہوگا۔

وزیراعظم شہباز شریف نے زراعت، معدنیات، قابل تجدید توانائی اور نوجوانوں کی تربیت جیسے شعبوں میں مشترکہ مواقع پر روشنی ڈالی اور کہا کہ آسٹریا جدید ٹیکنالوجی اور تجربے کے ذریعے پاکستان کے ترش پھلوں، مارملیڈ اور جوسز کی پیداوار اور برآمدات میں اہم شراکت دار ثابت ہو سکتا ہے۔

وزیراعظم اور چانسلر اسٹوکر نے بڑی کمپنیوں کے سربراہان کے ساتھ مشترکہ اجلاس کی صدارت بھی کی، جس میں فیصلہ کیا گیا کہ حکومت سے حکومت، حکومت سے کاروبار اور کاروبار سے کاروبار کے روابط کو مزید مؤثر بنایا جائے گا۔ وزیراعظم نے آسٹریا کی کمپنیوں کو اسلام آباد میں اپریل میں ہونے والے یورپی یونین-پاکستان بزنس فورم میں شرکت کی دعوت دی، جبکہ پاکستانی اور آسٹریا کی کمپنیوں کے درمیان مفاہمتی یادداشت پر دستخط بھی ہوئے۔