اردو انٹرنیشنل (مانیٹرنگ ڈیسک) ڈان نیوز کی خبر کے مطابق امریکا اور اسرائیل کی جانب سے ایران پر جاری حملوں کے دوران ایک اہم پیش رفت میں ایران کی اعلیٰ سکیورٹی قیادت کو نشانہ بنایا گیا ہے۔ ایرانی حکام نے تصدیق کی ہے کہ سپریم نیشنل سکیورٹی کونسل کے سربراہ ڈاکٹر علی لاریجانی اور بسیج فورس کے کمانڈر غلام رضا سلیمانی ایک فضائی حملے میں شہید ہو گئے ہیں۔
اسرائیلی وزیرِ دفاع نے دعویٰ کیا کہ یہ کارروائی گزشتہ رات کی گئی، جس میں دونوں اہم شخصیات کو نشانہ بنایا گیا۔ بعد ازاں ایرانی سپریم نیشنل سکیورٹی کونسل نے بھی لاریجانی کی شہادت کی تصدیق کرتے ہوئے بتایا کہ اس حملے میں ان کے اہلِ خانہ اور سکیورٹی اہلکار بھی شہید ہوئے۔
ایرانی میڈیا کے مطابق لاریجانی کو تہران کے نواحی علاقے میں اس وقت نشانہ بنایا گیا جب وہ نجی دورے پر موجود تھے، جبکہ بسیج کمانڈر غلام رضا سلیمانی بھی اسی کارروائی میں مارے گئے۔
پاسدارانِ انقلاب نے اس واقعے کو سخت الفاظ میں مذمت کرتے ہوئے کہا ہے کہ یہ حملہ ایران کے خلاف جاری جنگ
کا تسلسل ہے، تاہم اس سے مزاحمت کے عزم میں مزید اضافہ ہوگا اور اس کا جواب دیا جائے گا۔
ایرانی فوج کے سربراہ امیر حاتمی نے واضح کیا ہے کہ سپریم نیشنل سکیورٹی کونسل کے سربراہ کے قتل کا جواب ایسا ہوگا جسے دشمن کبھی فراموش نہیں کر سکے گا۔
ایران نے بدھ کے روز علی لاریجانی اور بسیج فورس کے کمانڈر غلام رضا سلیمانی کی نمازِ جنازہ ادا کرنے کا اعلان بھی کیا ہے۔
