Cristiano Ronaldo becomes the world's first trillionaire footballer-Getty images
پرتگال سے تعلق رکھنے والے عالمی شہرت یافتہ فٹبالر کرسٹیانو رونالڈو نے ایک اور تاریخی سنگِ میل عبور کرتے ہوئے دنیا کے پہلے کھرب پتی فٹبالر ہونے کا اعزاز حاصل کر لیا ہے۔
امریکی مالیاتی جریدے بلوم برگ کے تازہ بلینیئرز انڈیکس کے مطابق رونالڈو کی مجموعی دولت کا تخمینہ 1.4 ارب ڈالر لگایا گیا ہے، جو پاکستانی کرنسی میں 3 کھرب 93 ارب روپے سے زائد بنتی ہے۔
40 سالہ رونالڈو کی دولت میں نمایاں اضافہ اس وقت دیکھنے میں آیا جب انہوں نے 2023 میں سعودی فٹبال کلب النصر کے ساتھ سالانہ 177 ملین پاؤنڈ مالیت کا معاہدہ کیا اس معاہدے نے انہیں فٹبال کی تاریخ کا سب سے زیادہ معاوضہ لینے والا کھلاڑی بنا دیا۔
بلومبرگ کے مطابق، رونالڈو نے 2002 سے 2023 کے دوران صرف تنخواہوں کی مد میں 550 ملین ڈالر کمائے، جب کہ معروف اسپورٹس برانڈ کے ساتھ اسپانسرشپ ڈیل سے انہیں سالانہ 18 ملین ڈالر حاصل ہوئے۔ دیگر برانڈز کے اشتہارات سے ان کی آمدنی 175 ملین ڈالر سے تجاوز کر گئی۔
رونالڈو اب ان چند کھلاڑیوں کی فہرست میں شامل ہو گئے ہیں جنہوں نے کھیل کی دنیا میں ارب پتی کا درجہ حاصل کیا، جن میں مائیکل جارڈن، لیبرون جیمز، ٹائیگر ووڈز اور راجر فیڈرر شامل ہیں۔
