کینیڈین وزیر اعظم جسٹن ٹروڈو نے کہا ہے کہ کینیڈا اسرائیلی وزیر اعظم بنجمن نیتن یاہو کے لیے بین الاقوامی فوجداری عدالت (آئی سی سی) کی گرفتاری کے وارنٹ کی “پابندی” کرے گا۔
جسٹن ٹروڈو نے کہا کہ ہم بین الاقوامی قانون کے ساتھ کھڑے ہیں اور ہم بین الاقوامی عدالتوں کے تمام قواعد و ضوابط اور احکام کی پابندی کریں گے۔
خبررساں ادارے برکس نیوز نے سوشل میڈیا پلیٹ فارم ایکس میں اپنی ایک پوسٹ میں بتایا کہ سوئٹزرلینڈ اسرائیلی وزیر اعظم نیتن یاہو کو گرفتار کر لے گا اور اگر وہ ملک میں داخل ہوتے ہیں تو انہیں بین الاقوامی فوجداری عدالت میں منتقل کر دے گا۔
دوسری جانب نیدرلینڈز کے وزیرخارجہ کیسپر ویلڈ کیمپ نے عالمی عدالت کے فیصلے کا احترام کرنے کا اعلان کرتے ہوئے کہا ہے کہ اگر اسرائیل کے وزیراعظم نیتن یاہو ہماری سرزمین پر پاؤں رکھتے ہیں تو انہیں گرفتار کرلیا جائے گا۔
غیر ملکی خبرایجنسی کی رپورٹ کے مطابق نیدرلینڈز کے وزیرخارجہ کیسپر ویلڈ کیمپ نے کہا کہ اگر نیتن یاہو نے ہماری سرزمین پر پاؤں رکھا تو انہیں گرفتار کرلیا جائے گا۔
نیدرلینڈز کے نشریاتی ادارے کی جانب سے جاری بیان کے مطابق کیسپر ویلڈکیمپ نے پارلیمنٹ میں بتایا کہ نیدرلینڈز عالمی عدالت کے اس فیصلے کا احترام کرتا ہے جس میں اسرائیلی وزیراعظم نیتن یاہو کو گرفتار کرنے کا حکم دیا گیا ہے۔
