یو ایف اوز پر بڑا اعلان: ٹرمپ نے حکومتی خفیہ دستاویزات کھولنے کی ہدایت دے دی

اردو انٹرنیشنل (مانیٹرنگ ڈیسک ڈان نیوز کی خبر کے مطابق امریکی صدر ڈونلڈ ٹرمپ نے اعلان کیا ہے کہ وہ وفاقی اداروں کو ہدایت دیں گے کہ وہ خلائی مخلوق اور نامعلوم اُڑن اشیاء (یو ایف او) سے متعلق حکومتی ریکارڈ منظرِ عام پر لائیں۔ صدر نے کہا کہ یہ معاملہ عوام کی دلچسپی کا حامل ہے اور اس پر شفافیت ضروری ہے۔

ٹرمپ نے سوشل میڈیا پر لکھا کہ وہ پینٹاگون کے سربراہ پیٹ ہیگسیتھ اور دیگر متعلقہ اداروں کو ہدایت دیں گے کہ وہ دستیاب معلومات جاری کریں۔ انہوں نے اسے انتہائی دلچسپ اور اہم معاملہ قرار دیا۔ اسی روز صحافیوں سے گفتگو میں ٹرمپ نے سابق صدر براک اوباما پر الزام لگایا کہ انہوں نے خلائی مخلوق کے بارے میں بات کرتے ہوئے خفیہ معلومات کو غلط انداز میں بیان کیا، اور کہا کہ یہ “بڑی غلطی” تھی۔ تاہم انہوں نے اس دعوے کے حق میں کوئی ثبوت پیش نہیں کیا۔

دوسری جانب براک اوباما نے ایک پوڈکاسٹ انٹرویو میں کہا کہ خلائی مخلوق ممکنہ طور پر موجود ہے، لیکن انہوں نے خود انہیں نہیں دیکھا۔ اوباما نے واضح کیا کہ ایریا ففٹی ون میں کوئی خفیہ زیرِ زمین سہولت موجود نہیں ہے اور زمین تک خلائی مخلوق کے آنے کے امکانات کم ہیں۔ ایریا ففٹی ون نیواڈا میں امریکی فضائیہ کی خفیہ تنصیب ہے، جہاں ماضی میں خفیہ جاسوس طیاروں کی آزمائش کی گئی۔

اوباما نے انسٹاگرام پر بھی کہا کہ ان کے دورِ صدارت میں انہیں کوئی ثبوت نہیں ملا کہ خلائی مخلوق نے زمین سے رابطہ کیا یا یہاں کریش لینڈنگ کی۔ انہوں نے کہا کہ کائنات کی وسعت کی وجہ سے زمین سے باہر زندگی کے امکانات موجود ہیں، لیکن اس کا زمین پر آنے کا امکان بہت کم ہے۔

ٹرمپ نے بعد ازاں کہا کہ انہیں بھی خلائی مخلوق کے وجود کا کوئی ثبوت نہیں ملا اور کہا، مجھے معلوم نہیں کہ وہ حقیقی ہیں یا نہیں۔

پینٹاگون نے گزشتہ برسوں میں یو ایف او سے متعلق رپورٹس کی تحقیقات کی ہیں۔ 2022 میں اعلیٰ عسکری حکام نے کہا کہ انہیں ایسا کوئی ثبوت نہیں ملا کہ خلائی مخلوق نے زمین کا دورہ کیا یا یہاں کریش لینڈنگ کی۔ 2024 کی رپورٹ میں بھی کہا گیا کہ دوسری عالمی جنگ کے بعد امریکی حکومت کی تحقیقات میں کسی خلائی ٹیکنالوجی کا ثبوت نہیں ملا اور زیادہ تر مشاہدات عام اشیاء یا قدرتی مظاہر کی غلط شناخت تھے۔

امریکی نیشنل آرکائیوز کی ویب سائٹ کے مطابق یو ایف او سے متعلق ریکارڈ متعدد مجموعوں میں موجود ہے، تاہم صدر ٹرمپ کے تازہ اعلان کے بعد یہ واضح نہیں کہ کون سی نئی دستاویزات جاری ہوں گی اور ان میں کیا معلومات شامل ہوں گی۔ اس اعلان نے دوبارہ خلائی مخلوق اور یو ایف او سے متعلق بحث کو تیز کر دیا ہے۔