ایف-16 طیارہ حادثہ:یوکرین کے صدر نے فضائیہ کے سربراہ کو برطرف کر دیا
اردو انٹرنیشنل (مانیٹرنگ ڈیسک) یوکرینی صدر زیلنسکی کی جانب سے فضائیہ کے کمانڈر کو برطرف کر دیا گیا ہے۔ یہ برطرفی یوکرین میں ایف سولہ طیارے کے تباہ ہونے کے اگلے ہی روز کی گئی ہے۔ فضائیہ کے سربراہ مائیکولا اولیشچک کی برطرفی کے بارے میں بیان یوکرینی ایوان صدر سے جاری کیا گیا۔
یوکرین کے پاس ایف سولہ طیارے حال ہی میں ملے تھے، تاہم ان کی تعداد کوئی زیادہ نہیں ہے، ان ایف سولہ کے روس کے خلاف استعمال کی پہلی بار اطلاع اسی ہفتے کےدوران سامنے آئی تھی کہ یوکرین نے روسی ڈرونز اور میزائلوں کو فضا میں روکنے کے لیے استعمال کیا تھا۔
یوکرین کی طرف سے اس کا بڑے فخر اور خوشی کے ساتھ اظہار کیا گیا تھا۔ لیکن اگلے ہی روز جاری کردہ ایک بیان میں بتایا گیا ہے کہ پیر کے روز روسی حملے کو روکتے ہوئے ایک ایف سولہ طیارہ تباہ ہو گیا اور اس کا پائلٹ ہلاک ہو گیا۔
بیان میں یوکرینی صدر زیلنسکی نے کہا ہے۔’ میں نے فیصلہ کیا ہے کہ فضائیہ کےکمانڈر کو بدل دوں، تاہم میں اپنی فوج کے تمام پائلٹوں کا بہت ممنون ہوں۔’
اس سے قبل خیال رہے ولادیمیر زیلنسکی نے اس امر کا اعلان باضابطہ ٹی وی خطاب میں کیا ہے۔ تاہم فضائیہ سربراہ کی تبدیلی کے اس بڑے فیصلے کی کوئی وجہ بیان نہیں کی گئی ہے۔ یوکرین کے جنرل سٹاف لیفٹیننٹ جنرل اناٹولی کریونوہا کو عارضی طور پر فضائیہ کے سربراہ کی ذمہ داریاں ادا کرنے کے لیے کہا گیا ہے۔
دوسری جانب یوکرینی فوج نے پیر کے روز ایف سولہ طیارے کی تباہی کی بھی کوئی وجہ بیان نہیں کی تھی۔البتہ یہ کہا گیا ہے کہ امریکی مدد سے اس واقعے کی تحقیقات کی جائیں گی۔
امریکی دفاعی ذمہ دار نے اس بارے میں ‘رائٹرز’ سے بات کرتے ہوئے کہا ہے کہ’ یہ تباہی روسی فائرنگ کی وجہ سے نہیں لگتی ہے۔ امکانی طور پر وجہ پائلٹ کی غلطی بنی ہےیا کوئی مشینی خرابی بنی ہے۔’
روس کی طرف سے یوکرین پر اڑھائی سال پہلے کیے گئے حملے کے حوالے سے یوکرین کو امریکی ساختہ ایف سولہ طیاروں کی ترسیل ایک بڑی پیش رفت قرار دی جارہی تھی۔
