اسکاٹ لینڈ:حمزہ یوسف کے خلاف اپوزیشن کا تحریک عدم اعتماد لانےکا اعلان،عہدے سے مستعفی ہوسکتے ہیں
اردو انٹرنیشنل (مانیٹرنگ ڈیسک) اسکاٹ لینڈکے فرسٹ منسٹر حمزہ یوسف کے خلاف اپوزیشن نے تحریک عدم اعتماد لانےکا اعلان کر دیا جس کے بعد وہ عہدے سے مستعفی ہوسکتے ہیں۔
غیر ملکی خبر رساں اداروں کی رپورٹس کے مطابق یہ پیش رفت حکومتی اتحاد کے خاتمے کے چند گھنٹے بعد سامنے آئی جب اسکاٹش نیشنل پارٹی (ایس این پی) نے حکمران جماعت اسکاٹش گرینز (ایس جی) کے ساتھ اپنا معاہدہ ختم کر دیا۔
دونوں جماعتوں کے درمیان کشیدگی اس وقت ناقابل واپسی صورت حال تک پہنچی جب وزرا نے موسمیاتی تبدیلی کا ایک اہم ہدف پورا نہ ہونے اور بلوغت کی دوا کے استعمال کو روک دیا۔
دوسری جانب حمزہ یوسف کا کہنا ہے کہ وہ سکاٹ لینڈ کے پہلے وزیر کی حیثیت سے استعفیٰ نہیں دیں گے اور اپنے عہدے پر برقرار رہنے کا ارادہ رکھتے ہیں۔
حمزہ یوسف اگلے ہفتے ہونے والے عدم اعتماد کے ووٹ سے پہلے اپنے سیاسی مستقبل کی جنگ لڑ رہے ہیں۔
انہوں نے کہا کہ انہیں یقین ہے کہ وہ ووٹ جیت جائیں گے، اور انھیں امید ہے کہ سکاٹش گرینز انھیں برطرف کرنے کے لیے ووٹ دینے کے بارے میں اپنا ذہن بدل لیں گے۔
انہوں نے یہ بھی کہا کہ وہ عام انتخابات اور 2026 کے ہولیروڈ انتخابات میں SNP کی قیادت کریں گے۔
کنزرویٹو، لیبر، گرینز اور لبرل ڈیموکریٹس حمزہ یوسف پر عدم اعتماد کا اظہار کر رہے ہیں، انہیں اپنی پوزیشن برقرار رکھنے کے لیے ایش ریگن کی حمایت کی ضرورت ہوگی، جنہوں نے گزشتہ سال اسکاٹش نیشنل پارٹی سے علیحدگی اختیار کرلی تھی۔
اگر حمزہ یوسف کے خلاف تحریک عدم اعتماد کامیاب ہوجاتی ہے تو پارلیمان کے پاس انتخابات سے پہلے نئے وزیر کا انتخاب کرنے کے لیے 28 دن ہوں گے۔
برطانوی میڈیا کا کہنا ہے کہ حمزہ یوسف کو اپنی اسکاٹس نیشنل پارٹی کے 63 ممبران کی حمایت حاصل ہے جبکہ اپوزیشن جماعتوں کے پاس بھی 63 اراکین پارلیمنٹ کی حمایت موجود ہے۔
برطانوی میڈیا کے مطابق حکومت اور اپوزیشن کے ووٹ برابر ہونےکی صورت میں پریزائیڈنگ افسر ووٹ کاسٹ کرے گا، روایتی طور پر پریذائیڈنگ افسر حکومت کے حق میں ووٹ دیتا ہے۔
واضح رہے کہ پاکستانی نژاد حمزہ یوسف 29 مارچ 2023 کو اسکاٹ لینڈ کے فرسٹ منسٹر (وزیراعظم) منتخب ہوئے تھے۔
انہیں اسکاٹ لینڈ کے سب سے کم عمر نوجوان اور پہلے ایشیائی مسلم فرسٹ منسٹر ہونے کا اعزاز حاصل ہے۔
