اسلام آباد ڈسٹرکٹ کورٹ کے قریب مبینہ خودکش دھماکے میں 12 افراد جاں بحق، 21 زخمی

اسلام آباد میں منگل کے روزہونیوالے خودکش دھماکے  کے نتیجے میں کم از کم 12 افراد شہید اور 27 زخمی ہوئے۔ اس بات کی تصدیق وفاقی وزیر داخلہ محسن نقوی نے کی۔ میڈیا سے گفتگو کرتے ہوئے وزیر داخلہ نے بتایا کہ خودکش حملہ آج دوپہر 12 بج کر 39 منٹ پر ہوا۔

وزیر داخلہ کے مطابق خودکش بمبارعدالت کے احاطے میں داخل ہونے کی کوشش کر رہا تھا لیکن جب اسے موقع نہیں ملا تو اُس نے پولیس کی گاڑی کو نشانہ بنایا۔محسن نقوی نے بتایا کہ وزیراعظم شہباز شریف نے زخمیوں کو بہترین طبی سہولیات فراہم کرنے کی ہدایت دی ہے۔ ان کا کہنا تھا کہ سب سے پہلی ترجیح خودکش حملہ آور کی شناخت کرنا ہے۔

انہوں نے کہا کہ عدالت پر حملے کے ذمہ داروں کو بے نقاب کیا جائے گا۔آج کے حملے کے کئی روابط ہیں،شواہد جلد سامنے لائیں گے۔وزیر داخلہ نے خبردار کیا کہ اس حملے میں کئی پیغامات ہیں۔اگر اس کے پیچھے کسی دوسرے ملک کا ہاتھ ہوا تو اسے ہرگز معاف نہیں کیا جائے گا۔

انہوں نے مزید بتایا کہ خودکش بمبار حملے سے پہلے 10 سے 15 منٹ تک جائے وقوعہ پر موجود رہا اور عمارت میں داخل ہونے کی کوشش کرتا رہا۔ جیسے ہی ایک پولیس کی گاڑی پہنچی، اس نے خود کو دھماکے سے اڑا لیا۔

اس سے قبل وزیر داخلہ محسن نقوی نے اسلام آباد کی ضلعی عدالتوں کے باہر دھماکے کی جگہ کا دورہ کیا اور ہدایت دی کہ سرچ آپریشن فوری مکمل کیا جائے۔ اسلام آباد پولیس کے انسپکٹر جنرل علی ناصر رضوی نے انہیں واقعے کی تفصیلات سے آگاہ کیا۔

دھماکے کے بعد کچہری کی عمارت کو خالی کرایا گیا جبکہ عمارت کے اندر موجود افراد کو پچھلے دروازے سے نکالا گیا۔ عدالت کی کارروائیاں معطل کر دی گئیں۔ابتدائی طور پر پولیس نے بتایا کہ دھماکہ عدالت کے باہر کھڑی ایک گاڑی میں ہوا۔زخمیوں میں درخواست گزار اور وکلاء بھی شامل ہیں۔

اسلام آباد کے ڈپٹی انسپکٹر جنرل، چیف کمشنر اور فرانزک ٹیم جائے وقوعہ پر پہنچ گئیں جبکہ ریسکیو ٹیموں نے زخمیوں اور شہداء کو اسپتال منتقل کیا۔

پمز اسپتال میں ایمرجنسی نافذ کر دی گئی ہے۔ذرائع کے مطابق مبینہ خودکش حملہ آور کا “سر” جائے وقوعہ سے برآمد ہوا ہے۔ذرائع نے یہ بھی بتایا کہ یہ دھماکہ بھارت کے حمایت یافتہ دہشت گردوں اور افغان طالبان کے پراکسی گروہ “فتنہ الخوارج” نے کیا۔

وانا کیڈٹ کالج پر حملہ

یہ حملہ ایک دن بعد اس وقت ہوا جب جنوبی وزیرستان کے وانا کیڈٹ کالج پر بھارتی حمایت یافتہ دہشت گردوں نے حملہ کیا۔

آئی ایس پی آر کے مطابق، سیکیورٹی فورسز نے دو دہشت گردوں کو ہلاک کر دیا جبکہ تین کو عمارت کے اندر گھیر لیا گیا۔اسلام آباد واقعے سے متعلق گفتگو کرتے ہوئے محسن نقوی نے کہا کہ ایک اور خودکش حملہ وانا میں ہوا، جہاں تین افراد شہید ہوئے۔ دہشت گردوں نے منصوبہ بنایا تھا کہ وہ کیڈٹ کالج کے افراد کو یرغمال بنائیں گے لیکن سیکیورٹی فورسز نے منصوبہ ناکام بنا دیا۔

انہوں نے بتایا کہ دہشت گرد اپنے “ہینڈلر” سے افغانستان میں رابطے میں تھے۔ہمیں اپنے ملک اور افواج کے ساتھ کھڑا ہونا ہوگا،انہوں نے زور دیا۔وانا میں کلیئرنس آپریشن جاری ہے۔نقوی نے مزید کہا کہ “شواہد موجود ہیں کہ دہشت گردوں کی تربیت افغانستان میں ہو رہی ہے۔ اگر انہیں نہیں روکا گیا تو ہم خود کارروائی کریں گے۔

زخمیوں کی حالت

پمز اسپتال کے ترجمان ڈاکٹر مبشر دہا نے تصدیق کی کہ “دھماکے میں 12 افراد شہید جبکہ زخمیوں کی تعداد 30 تک پہنچ گئی ہے۔انہوں نے کہا کہ پمز میں ایمرجنسی نافذ کر دی گئی ہے اور زخمیوں کو طبی امداد فراہم کی جا رہی ہے۔ تمام وسائل بروئے کار لائے جا رہے ہیں۔

’انتباہی پیغام‘

صدر آصف علی زرداری نے ایکس (سابق ٹوئٹر) پر پوسٹ کرتے ہوئے جاں بحق افراد کے لواحقین سے اظہار تعزیت کیا، زخمیوں کی جلد صحتیابی کی دعا کی، اور قانون نافذ کرنے والے اداروں کو خراج تحسین پیش کیا۔

وفاقی وزیر دفاع خواجہ آصف نے کہا کہ یہ واقعہ ایک “انتباہی پیغام” ہے۔انہوں نے کہا، “ہم حالتِ جنگ میں ہیں۔ جو یہ سمجھتا ہے کہ فوج صرف افغان سرحد یا بلوچستان کے دور دراز علاقوں میں لڑ رہی ہے، آج کا اسلام آباد کا خودکش حملہ اس کے لیے ایک انتباہ ہے۔ایسے حالات میں کابل حکومت کے ساتھ کامیاب مذاکرات کی امید رکھنا بے کار ہے۔

سندھ کے وزیر داخلہ ضیاء الحسن لنجار نے بھی واقعے کی مذمت کرتے ہوئے کہا کہ “خودکش بمبار اور دہشت گرد کسی مذہب کے نہیں ہوتے، وہ انسانیت کے دشمن ہیں۔”

انہوں نے کہا کہ سندھ پولیس کو ہائی الرٹ کر دیا گیا ہے اور صوبے کی داخلی و خارجی شاہراہوں، ہائی ویز، اور دیہی راستوں پر نگرانی سخت کر دی گئی ہے۔

گورنر خیبر پختونخوا فیصل کریم کنڈی نے بھی دھماکے کی مذمت کرتے ہوئے کہا کہ “معصوم لوگوں کا خون بہانے والے اس قوم اور انسانیت کے دشمن ہیں، دہشت گرد کسی رعایت کے مستحق نہیں۔