یورپی ممالک کا ایران-امریکا جنگ بندی کا خیرمقدم، لبنان میں بھی عملدرآمد کا مطالبہ
اردو انٹرنیشنل (ویب ڈیسک ) برطانیہ سمیت دیگر یورپی ممالک نے ایران اور امریکا کے درمیان جنگ بندی کا خیرمقدم کرتے ہوئے تمام فریقین سے اس پر مکمل عملدرآمد کی اپیل کی ہے، جبکہ لبنان میںبھی جنگ بندی یقینی بنانے پر زور دیا گیا ہے۔
مشترکہ اعلامیہ فرانس، اٹلی، جرمنی، کینیڈا، ڈنمارک، نیدرلینڈز، اسپین، یورپی کمیشن، یورپی کونسل اور جاپان کے رہنماؤں کی جانب سے جاری کیا گیا۔
اعلامیے میں کہا گیا ہے کہ ایران-امریکا جنگ بندی ایک مثبت پیش رفت ہے، اور اس میں کردار ادا کرنے پر پاکستان سمیت دیگر شراکت داروں کا شکریہ ادا کیا گیا۔ رہنماؤں نے اس بات پر زور دیا کہ جاری مذاکرات کا مقصد جنگ کا جلد اور مستقل خاتمہ ہونا چاہیے، جو صرف سفارتی ذرائع سے ہی ممکن ہے۔
اعلامیے کے مطابق بامعنی معاہدے کے لیے فوری پیش رفت کی حوصلہ افزائی کی گئی ہے، جو نہ صرف ایران کے شہریوں کے تحفظ بلکہ پورے خطے میں سیکیورٹی کے قیام کے لیے اہم ہوگی۔ اس کے ساتھ ہی کہا گیا کہ یہ اقدامات ممکنہ عالمی توانائی بحران کو روکنے میں بھی مددگار ثابت ہو سکتے ہیں۔
یورپی ممالک نے واضح کیا کہ وہ ان سفارتی کوششوں کی مکمل حمایت کرتے ہیں اور اس مقصد کے لیے امریکا اور دیگر اتحادیوں کے ساتھ مسلسل رابطے میں ہیں۔
