ٹرمپ کی پاکستان کی کھلی تعریف، امریکا کا واضح اعلان – حقِ دفاع کی مکمل حمایت

اردو انٹرنیشنل (مانیٹرنگ ڈیسک) بزنس رکارڈر کی خبر کے مطابق پاک۔افغان سرحد پر بڑھتی ہوئی کشیدگی کے دوران امریکا نے پاکستان کے حقِ دفاع کی واضح حمایت کر دی ہے، جبکہ امریکی صدر ڈونلڈ ٹرمپ نے پاکستان کی حالیہ عسکری کارروائیوں کو سراہتے ہوئے کہا ہے کہ ملک بہت شاندار انداز میں آگے بڑھ رہا ہے۔

میڈیا سے گفتگو میں ٹرمپ نے کہا کہ ان کے پاکستان کے ساتھ تعلقات نہایت مضبوط ہیں۔ انہوں نے وزیر اعظم شہباز شریف اور چیف آف آرمی اسٹاف فیلڈ مارشل عاصم منیر کو بہترین قیادت قرار دیتے ہوئے کہا کہ وہ ان شخصیات کا بے حد احترام کرتے ہیں۔ ان کا کہنا تھا کہ اگر کسی نے مداخلت کی درخواست کی تو وہ کردار ادا کرنے کو تیار ہیں، تاہم پاکستان اس وقت صورتحال کو مؤثر انداز میں سنبھال رہا ہے۔

امریکی محکمہ خارجہ کی انڈر سیکریٹری برائے سیاسی امور ایلیسن ہوکر نے پاکستانی ہم منصب سے گفتگو کے بعد بیان دیا کہ امریکا طالبان حملوں کے خلاف پاکستان کے دفاعی اقدامات کی حمایت کرتا ہے اور حالات پر قریبی نظر رکھے ہوئے ہے۔

پاکستانی وزیر اطلاعات عطا اللہ تارڑ کے مطابق آپریشن غضبُ الحق مبینہ بلااشتعال سرحد پار فائرنگ کے ردعمل میں شروع کیا گیا۔ ان کے دعوے کے مطابق کارروائی کے دوران 297 افغان طالبان جنگجو ہلاک اور 450 سے زائد زخمی ہوئے، جبکہ 89 چیک پوسٹیں تباہ اور 18 پر قبضہ کیا گیا۔ مزید یہ کہ 135 ٹینک اور بکتر بند گاڑیاں بھی تباہ کی گئیں۔

دوسری جانب کابل میں طالبان ترجمان ذبیح اللہ مجاہد نے کہا ہے کہ افغانستان تنازع کو مذاکرات کے ذریعے حل کرنا چاہتا ہے۔ ان کا مؤقف ہے کہ مسائل کا حل بات چیت میں ہے اور کشیدگی کم کی جانی چاہیے۔

ادھر یورپی یونین کی خارجہ پالیسی سربراہکجا کالس اور برطانیہ کی وزیر خارجہ یویٹ کوپرنے بھی فوری کشیدگی میں کمی، شہریوں کے تحفظ اور مذاکرات کی جانب واپسی پر زور دیا ہے۔