Prime Minister Shehbaz Sharif Inaugurates Bober Model Village for Flood Victims in Ghizer
وزیر اعظم شہباز شریف نے غذر میں سیلاب متاثرین کیلئے بوبر ماڈل ویلج کا افتتاح کر دیا
اردو انٹرنیشنل (مانیٹرنگ ڈیسک) وزیر اعظم شہباز شریف آج ایک روزہ دورے پر گلگت بلتستان پہنچے ہیں جہاں انہوں نے ضلع غذر میں 2022 کے سیلاب سے متاثرہ گاؤں میں متاثرین کے لیے بوبر ماڈل ویلج کا افتتاح کر دیا۔
غذر کے گاؤں بوبرمیں 2022 کے سیلاب کے باعث تباہ ہونے والی بستی کی جگہ نئے ماڈل ویلیج کے افتتاح اور متاثرین کو نو تعمیر شدہ گھروں کے ملکیتی کاغذات دینے کی تقریب سے خطاب کرتے ہوئے وزیراعظم نے کہا کہ وہ اگست 2022 میں یہاں آئے تھے جہا ں ہر طرف سیلاب کے بعد تباہی کے مناظر تھے۔
ان کا کہنا تھا کہ موسمیاتی تبدیلیوں کے نتیجے میں تباہ کن سیلاب اور بارشوں نے پورے گاؤں کو زمین بوس کر دیاتھا، آج یہاں نئی بستی تعمیر کی جاچکی ہے، متاثرہ خاندانوں کو ان کے گھروں کے ملکیتی کاغذات دیے جا چکے ہیں۔
وزیراعظم نے متاثرین کی بحالی، آباد کاری اور تعمیر نو پر متعلقہ اداروں اور حکام کو شاباش دیتے ہوئے انہیں نئے تعمیر شدہ گھروں کو موسم سرما میں قابل رہائش بنانے کیلئے انتظامات کرنے کی بھی ہدایت کی۔
ان کا کہنا تھا کہ ماڈ ل ویلج کے معیار کو جانچنے کے لیے کسی تیسرے فریق سے توثیق کرائے بغیر ادائیگیاں نہ کی جائیں اور اسکول، ڈسپنری اور کھیل کے میدان سمیت تمام ضروری سہولتیں فراہم کی جائیں۔
وزیر اعظم نے ڈسپنسری میں الٹراساؤنڈ، ایکسرے اور زچگی سمیت تمام ضروری سہولیات فوری فراہم کرنے کی بھی ہدایت کی۔
وزیراعظم نے بتایا کہ انہوں نے سیلاب متاثرہ بچی قندیل کے لئے 50 لاکھ روپے کے انڈوومنٹ فنڈ کا اعلان کیاتھا ، آج وہ فنڈ 67 لاکھ تک پہنچ چکاہے۔
وزیراعظم نے متاثرین کو ان کےگھروں کے الاٹمنٹ لیٹرز تقسیم کیے، قبل ازیں وزیراعظم نے بوبر ماڈل ویلج کاافتتاح کیا۔
وزیراعظم کو نئے تعمیر شدہ گھروں کے بارے میں بھی بریفنگ دی گئی جس میں بتایا گیا کہ یہ ماڈل ویلج 110 کنال اراضی پر تعمیر کیا گیا ہے جس میں 62 گھر ہیں۔
وزیراعظم کو بتایا گیا کہ 216 کلومیٹر گلگت شندور شاہراہ بھی تعمیر کی جا رہی ہے، وزیر اعظم نے اس منصوبے پر کام کی رفتار تیز کرنے کی ہدایت کی۔
