فلسطین کا اسرائیل سے غزہ کی تعمیر نو کے اخراجات کا مطالبہ
اردو انٹرنیشنل(مانیٹرنگ ڈیسک) تفصیلات کے مطابق فلسطینی اتھارٹی نے اسرائیل سے غزہ کی تعمیر نو کا مالی بوجھ اٹھانے کا مطالبہ کیا ہے.
ترکش ریڈیو ٹیلی ویژن کارپوریشن (TRT) کے مطابق فلسطینی اتھارٹی نے اسرائیل سے غزہ کی تعمیر نو کا مالی خرچہ برداشت کرنے کا مطالبہ کرتے ہوئے اس بات پر بھی زور دیا ہے کہ اسرائیل دو ریاستی حل کو برقرار رکھنے کے لیے زیادہ عزم کا مظاہرہ کرے۔
فلسطین کے وزیر عظم محمد اشتیہ نے رملہ میں جاپان کے وزیر مملکت برائے خارجہ امور تسوجی کیوٹو سے ملاقات کے دوران کہا کہ اسرائیل کو غزہ کی پٹی میں ہونے والی تباہی اور ہلاکتوں کے لیے جوابدہ ہونا چاہیے اور اسرائیل کو غزہ کی تعمیر نو کی ذمہ داری قبول کرنی چاہیے.
محمد اشتیہ نے اسرائیل کے اقدامات کی مذمت کرتے ہوئے کہا کہ اسرائیل فلسطینی عوام کے خلاف شدید مظالم کا ارتکاب کرتا ہے، نسل پرستی کو فروغ دیتا ہے اور ایسا برتاؤ کرتا ہے جیسے وہ قانونی نتائج سے محفوظ ہے۔
انہوں نے زور دے کر کہا کہ ترجیح یہ ہے کہ غزہ کی پٹی, یروشلم اور مغربی کنارے میں فلسطینی لوگوں کے خلاف جارحیت کو روکا جائے.
واضح رہے کہ فلسطینی وزیر اعظم محمد اشتیہ حکومت سے مستعفی ہونے کا علان کر چکے ہیں تاہم وہ اس وقت تک نگراں انتظامیہ کے طور پر کام کریں گے جب تک کہ کوئی نئی حکومت تشکیل نہیں پاتی.
