اردو انٹرنیشنل (اسپورٹس ویب ڈیسک) تفصیلات کے مطابق پاکستان کے آئی ٹی ایف سینئر کھلاڑی راشد ملک نے دبئی میں ہونے والے آئی ٹی ایف دبئی ماسٹرز 200 ایم ٹی کے 60+ سنگلز فائنل میں کامیابی حاصل کی ۔
راشد ملک کا مقابلہ 60 سال سے زائد عمر کے سنگلز کے فائنل میں اپنے ہی ڈبلز پارٹنر، برطانیہ کے اینڈریو ہیبل سے ہوا۔ راشد ملک نے پہلا سیٹ 6-2 سے بآسانی جیتا، حالانکہ دوسرے سیٹ میں اینڈریو ہیبل نے سخت مقابلہ کیا، لیکن راشد ملک نے دوسرا سیٹ 6-3 سے جیت کر میچ اپنے نام کر لیا اور یہ ٹائٹل جیت لیا۔
اب راشد ملک اور اینڈریو ہیبل 60+ ڈبلز کے فائنل میں ایک ساتھ کھیلیں گے، جہاں ان کا سامنا بھارت کے گارسین لوبو اور عبدالرحیم کی جوڑی سے ہوگا۔ پاک-برطانوی جوڑی اپنی کارکردگی پر پراعتماد ہے اور ان کا مقصد ڈبلز ٹائٹل جیتنا ہے۔ اگر یہ جوڑی جیت جاتی ہے تو راشد ملک کے لیے یہ دوسرا ٹائٹل ہوگا۔
دوسری جانب، 45 سال سے زائد عمر کے سنگلز مقابلے میں بھارت کے پانچویں نمبر کے کھلاڑی کرشنا کمار نے کوارٹر فائنل میں پاکستان کے تیسرے نمبر کے شہریار سلامت کو شکست دے دی۔ اس سے پہلے، شہریار سلامت نے بھارت کے رام کرشنن راجکمار کو آسانی سے 6-1 اور 6-0 کے اسکور سے ہرایا تھا۔
