پاکستان بلائنڈ ٹی ٹوئنٹی کرکٹ ورلڈ کپ کی میزبانی کرے گا
اردو انٹرنیشنل (اسپورٹس ڈیسک) تفصیلات کے مطابق ورلڈ بلائنڈ کرکٹ کونسل نے نومبر 2024 میں ہونے والے ایونٹ سے قبل چوتھے بلائنڈ ٹی ٹوئنٹی کرکٹ ورلڈ کپ کی میزبانی کے حقوق پاکستان کو دے دیے ہیں۔
یہ پہلا موقع ہوگا جب ہندوستان کے علاوہ کوئی اور ملک ورلڈ کپ کی میزبانی کرے گا ہندوستان نے 2012، 2017 اور 2022 میں منعقدہ ٹی ٹوئنٹی ورلڈ کپ کے تمام پچھلے ایڈیشن بھی جیتے ہیں۔
ہندوستانی بلائنڈ ٹیم نے سب سے پہلے اس ٹورنامنٹ میں سری لنکا، بنگلہ دیش، نیوزی لینڈ، جنوبی افریقہ، نیپال اور ممکنہ طور پر ویسٹ انڈیز کے ساتھ نومبر میں ہونے والے ورلڈ کپ میں شرکت کی تصدیق کی تھی۔
بھارت 2011 اور 2014 میں بلائنڈ کرکٹ ورلڈ کپ کے لیے بھی پاکستان آیا تھا۔
جب ان سے پاکستان میں ہونے والے ٹورنامنٹس میں شرکت کے لیے ہندوستان کی ہچکچاہٹ کے بارے میں پوچھا گیا تو ڈبلیو بی سی سی کے صدر سید سلطان شاہ نے کہا کہ انڈین بلائنڈ کرکٹ ٹیم کو بیرون ملک دوروں اور ٹورنامنٹس کے لیے اپنی حکومت سے این او سی کی ضرورت نہیں ہے۔
انہوں نے مزید کہا کہ اگر وہ نہیں آنا چاہتے تو فوراً کہہ دیتے کہ ان کی حکومت ٹیم کو دورہ پاکستان کی اجازت نہیں دے گی۔
ڈبلیو بی سی سی کے صدر نے ممکنہ مقامات کے بارے میں بھی بات کرتے ہوئے کہا کہ کراچی ایک بڑا بین الاقوامی شہر ہے اس لیے ٹورنامنٹ کی میزبانی کے لیے ہمارا پہلا آپشن کراچی ہوگا لیکن اگر سندھ حکومت تعاون فراہم نہیں کرتی ہے تو ایونٹ کو لاہور منتقل کرنے کا امکان ہے۔
واضح رہے کہ پاکستان 2025 میں آئی سی سی چیمپئنز ٹرافی کی میزبانی کرے گا اور بھارت اس ٹورنامنٹ میں شرکت سے ہچکچاہٹ کا مظاہرہ کر رہا ہے.
