Pakistan is active in reducing tensions in the Middle East, Prime Minister holds important meeting with Chinese Ambassador
اردو انٹرنیشنل (مانیٹرنگ ڈیسک) ڈان نیوز کی خبر کے مطابق وزیرِاعظم شہباز شریف نے کہا ہے کہ پاکستان مشرقِ وسطیٰ میں کشیدگی کم کرنے اور علاقائی استحکام کے فروغ کے لیے فعال اور تعمیری کردار ادا کر رہا ہے۔ یہ بات انہوں نے چینی سفیرجیانگ زیڈونگ سے ملاقات کے دوران کہی، جو وزیراعظم ہاؤس میں منعقد ہوئی۔
سرکاری اعلامیے کے مطابق ملاقات میں نائب وزیراعظم و وزیر خارجہ اسحاق ڈار، معاون خصوصی سید طارق فاطمی اور دیگر اعلیٰ حکام بھی شریک تھے۔ اس موقع پر مشرقِ وسطیٰ کی موجودہ صورتحال، دوطرفہ تعلقات اور خطے میں امن کے امکانات پر تفصیلی تبادلہ خیال کیا گیا۔
وزیراعظم نے پاکستان کی سفارتی کاوشوں کا ذکر کرتے ہوئے کہا کہ ملک مسلسل متعلقہ فریقین کے ساتھ رابطے میں ہے اور کشیدگی کم کرنے کیلئے عملی اقدامات کر رہا ہے۔
ملاقات کے دوران وزیراعظم نے چین کی مستقل اقتصادی حمایت کو سراہا اور چین پاکستان اقتصادی راہداری کے دوسرے مرحلے کو تیز کرنے کے عزم کا اعادہ کیا۔
وزیر اعظم نے چینی قیادت، بالخصوص شی چنگ پنگ ، وزیراعظم لی چیانگ اور وزیر خارجہ وانگ یی کی جانب سے یومِ پاکستان پر بھیجے گئے تہنیتی پیغامات پر شکریہ ادا کیا اور دونوں ممالک کے درمیان اسٹریٹجک شراکت داری کو مزید مضبوط بنانے پر زور دیا۔
چینی سفیر نے پاکستان کی معاشی بہتری اور اصلاحاتی اقدامات کو سراہتے ہوئے تجارت اور سرمایہ کاری کے شعبوں میں تعاون جاری رکھنے کے عزم کا اظہار کیا۔ دونوں جانب سے سفارتی تعلقات کی 75ویں سالگرہ کے موقع پر اعلیٰ سطح روابط بڑھانے پر بھی اتفاق کیا گیا۔
وزیراعظم نے اس عزم کا اعادہ کیا کہ پاکستان خطے میں امن کے قیام اور کشیدگی کے خاتمے کیلئے اپنی سفارتی کوششیں بھرپور انداز میں جاری رکھے گا۔
