پاکستان سے متعلق ورلڈ بینک کی نئی رپورٹ جاری،غربت کی شرح میں اضافہ
اردو انٹرنیشنل (مانیٹرنگ ڈیسک) ورلڈ بینک کی ایک نئی رپورٹ نے پاکستان میں بڑھتی ہوئی قومی غربت کی شرح پر توجہ دلاتے ہوئے کمزور طبقوں کے تحفظ کے لیے پائیدار اور عوامی مرکزیت پر مبنی اصلاحات کی ضرورت پر زور دیا ہے۔
رپورٹ کا عنوان “خوشحالی کی طرف دوبارہ رفتار کا دعویٰ: پاکستان کی غربت، مساوات اور لچک کا جائزہ” ہے، جو 2000 کی دہائی کے اوائل کے بعد ملک میں غربت اور فلاحی رجحانات کا پہلا جامع جائزہ ہے۔
ورلڈ بینک کے مطابق، قومی غربت کی شرح میں 02-2021 میں 64.3 فیصد سے 19-2018 میں 21.9 فیصد تک کمی آئی تھی، مگر 2020 کے بعد دوبارہ اضافہ ہونا شروع ہوا۔
بیان میں کہا گیا کہ یہ رجحان بنیادی طور پر کئی معاملات کی وجہ سے ہے، جن میں کووِڈ-19، مہنگائی، سیلاب، اور معاشی دباؤ شامل ہیں — لیکن ساتھ ہی کھپت پر مبنی نمو کا ماڈل جو ابتدائی کامیابیاں لایا تھا، اب اپنی حد کو پہنچ چکا ہے۔
رپورٹ نے 25 سال کے گھریلو سرویز، جیواسپیشل تجزیے اور دیگر منفرد انتظامی ڈیٹا کو شامل کیا۔
ورلڈ بینک کی غربت کی سرکاری شرح کا انحصار گھریلو انٹیگریٹڈ اکنامک سروے پر ہے۔ 19-2018 کے بعد کے تخمینے مائیکرو سمولیشن ماڈلز کے ذریعے لگائے گئے ہیں، جبکہ نئے کی اشاعت کے بعد سامنے آئیں گے۔
سست اور غیر متوازن معاشی ڈھانچے
غربت میں کمی زیادہ تر غیر زرعی لیبر آمدنی میں اضافے سے ہوئی، یعنی لوگ کھیتوں کے کام سے نکل کر سروسز سیکٹر کی ملازمتوں کی طرف گئے۔
مگر سست اور غیر متوازن معاشی ڈھانچے نے متنوع معیشت، روزگار کے مواقع اور جامع ترقی کو روکا۔
پچاسی (85) فیصد سے زیادہ ملازمتیں غیر رسمی رہیں، جبکہ خواتین اور نوجوان بڑی حد تک لیبر فورس سے باہر ہیں۔
تقریباً 40 فیصد بچے غذائی قلت کا شکار ہیں، ایک چوتھائی بچے پرائمری اسکول سے باہر ہیں، اور جو پڑھ رہے ہیں ان میں سے 75 فیصد کی پڑھنے کی صلاحیت بہت محدود ہے۔
صرف نصف گھرانوں کو پینے کے محفوظ پانی تک رسائی ہے (2018 کے مطابق) اور 31 فیصد کو محفوظ نکاسی آب میسر نہیں۔
شہروں اور دیہات میں فرق
رپورٹ نے پاکستان میں فلاح و بہبود کے میدان میں وسیع اور دیرپا علاقائی تفاوت کو اجاگر کیا۔ دیہی غربت شہری غربت سے دوگنی ہے، اور کئی پسماندہ اضلاع آج بھی وہیں کھڑے ہیں جہاں دہائیوں پہلے تھے۔ غیر منصوبہ بند شہری آبادی سے “بانجھ اجتماعیت” (sterile agglomeration) پیدا ہوئی — یعنی تنگ بستیاں جہاں معیارِ زندگی پست ہے۔
عوامی مرکزیت پر مبنی اصلاحات ناگزیر
رپورٹ نے زور دیا کہ کمزور گھرانوں کے تحفظ، بہتر روزگار کے مواقع، اور بنیادی سہولتوں کی فراہمی کے لیے سستے اور عوامی مرکزیت پر مبنی اصلاحات ناگزیر ہیں۔
“اعلیٰ معیار کی سہولتوں تک رسائی بڑھانا، گھرانوں کو جھٹکوں سے محفوظ رکھنا، اور بہتر ملازمتیں پیدا کرنا — خصوصاً نچلے 40 فیصد کے لیے — غربت کے چکر کو توڑنے اور پائیدار ترقی کے لیے لازمی ہیں۔
عوام، علاقوں اور عوامی خدمات میں سرمایہ کاری۔
مقامی حکمرانی کو مضبوط بنانا۔
جامع سماجی تحفظ کے جال جو جھٹکوں کے خلاف لچک پیدا کریں۔
ترقی پسند مالی اقدامات، میونسپل فنانس میں بہتری، اور بروقت ڈیٹا سسٹمز میں سرمایہ کاری۔
ورلڈ بینک کی کنٹری ڈائریکٹر برائے پاکستان بولورما آمگابازار نے کہا پاکستان کی مشکل سے حاصل کردہ کامیابیوں کا تحفظ اور اصلاحات کی رفتار کو تیز کرنا ضروری ہے تاکہ زیادہ روزگار اور مواقع فراہم ہوں، خاص طور پر خواتین اور نوجوانوں کے لیے۔”
انہوں نے مزید کہا کہ اگر پاکستان نتائج پر توجہ دے — یعنی عوام اور علاقوں میں سرمایہ کاری کرے، جھٹکوں کے مقابلے میں لچک پیدا کرے، مالی نظم و ضبط کو ترجیح دے، اور ڈیٹا سسٹمز بہتر بنائے — تو غربت میں کمی دوبارہ ممکن ہو سکتی ہے۔
یاد رہے کہ رواں سال جنوری میں ورلڈ بینک نے پاکستان کے ساتھ 10 سالہ کنٹری پارٹنرشپ فریم ورک کے تحت 20 ارب ڈالر فراہم کرنے کا عزم کیا تھا تاکہ شمولیتی اور پائیدار ترقی کی حمایت کی جا سکے۔
