پاک-امریکا سفارتی قربت کی نئی پیش رفت،عالمی میڈیا کی نظر میں

بھارتی خبر رساں ادارہ ٹائمز آف انڈیا نے اپنی رپورٹ میں لکھا ہے کہ پاکستان کے وزیرِاعظم شہباز شریف نے جمعے کے روز امریکی صدر ڈونلڈ ٹرمپ کو ’’امن کا علمبردار‘‘ قرار دیتے ہوئے ان کا شکریہ ادا کیا کہ انہوں نے پاکستان اور بھارت کے درمیان جنگ بندی میں سہولت فراہم کی۔شہباز شریف نے کہا کہ ٹرمپ کے ’’دلیرانہ، جرات مندانہ اور فیصلہ کن‘‘ اقدامات نے جنوبی ایشیا میں ایک ’’بڑے سانحے‘‘ کو ٹال دیا۔

بھارتی میڈیا نے اس بیان کو اجاگر کرتے ہوئے یہ بھی یاد دلایا کہ صرف چند روز قبل بھارت کے نائب وزیرِاعظم نے واضح طور پر کہا تھا کہ بھارت نے آپریشن ’سندور‘ کے دوران کسی تیسرے فریق کی ثالثی کو قبول نہیں کیا۔ بھارت نے دعویٰ کیا کہ پاکستان کے خلاف فوجی کارروائی روکنے کے لیے کسی امریکی ثالثی کا کردار موجود نہیں تھا اور نئی دہلی نے ہر طرح کی بیرونی مداخلت کو مسترد کر دیا تھا۔

بھارتی اخبارات اور ٹی وی چینلز کے مطابق، شہباز شریف کے حالیہ بیان نے پاک-امریکہ تعلقات میں بڑھتی ہوئی قربت اور واشنگٹن کی ثالثی کے دعوے کو ایک بار پھر عالمی توجہ کا مرکز بنا دیا ہے، جبکہ بھارت اس مؤقف پر قائم ہے کہ کشمیر اور دیگر تنازعات صرف دو طرفہ بنیادوں پر حل ہوں گے۔