اسلام آباد ہائی کورٹ نے ایف آئی اے اور پولیس کو شیر افضل مروت کیخلاف کارروائی سے روک دیا
اردو انٹرنیشنل ( مانیٹرنگ ڈیسک) تفصیلات کے مطابق اسلام آباد ہائی کورٹ نے ایف آئی اے اور پولیس کو پاکستان تحریک انصاف کے رہنما شیر افضل مروت کے خلاف تادیبی کارروائی سے روک دیا ہے اور فریقین کو نوٹس جاری کرتے ہوئے 26 فروری تک رپورٹ طلب کرلی۔
اسلام آباد ہائی کورٹ کی جسٹس ثمن رفعت امتیاز نے کیس کی سماعت کی.
شیر افضل مروت نے عدالت میں پیش ہو کر مؤقف اختیار کیا کہ انھوں نے احتجاج کیا اور ریلی نکالی جس کے بعد ان کے گھر پر چھاپا مارا گیا اور ان کے گھر کا دروازہ رات کے ایک بجے توڑ کر انہیں ہراساں کیا گیا۔
شیر افضل مروت نے کہا کہ پولیس اور ایف آئی اے سے کیسوں کی تفصیل منگوالی جائے جس پر جسٹس ثمن رفعت امتیاز نے کہا کہ پہلے نوٹس بھیج کر جواب مانگ لیتے ہیں۔
عدالت نے پولیس اور ایف آئی اے کو پی ٹی آئی کے سینئر رہنما شیر افضل مروت کے خلاف تادیبی کارروائی سے روکتے ہوئے 26 فروری تک رپورٹ طلب کر لی ہے.
عدالت نے کہا کہ شیر افضل مروت کے خلاف کتنے کیسز درج ہیں 26 فروری تک بتایاجائے۔
