دکھاوا نہیں سادگی کا فلسفہ دینے والے جورجیو ارمانی 91 برس کی عمر میں انتقال کر گئے

عالمی شہرت یافتہ اطالوی فیشن ڈیزائنر جورجیو ارمانی 91 برس کی عمر میں انتقال کر گئے۔ ان کی کمپنی کی جانب سے ان کے انتقال کی خبر کی تصدیق کی گئی ، کمپنی کی جانب سے جاری بیان میں بتایا گیا کہ ارمانی اپنی آخری سانس تک اپنے کام، نئے ڈیزائنز اور کمپنی کے منصوبوں میں مصروف رہے۔

جورجیو ارمانی کا شمار دنیا کے کامیاب ترین اور بااثر ڈیزائنرز میں ہوتا ہے۔ انہیں دنیا بھر میں “کنگ جورجیو” کے لقب سے جانا جاتا تھا۔ ان کی پہچان ہمیشہ سادہ، ہلکے اور نفیس ڈیزائن رہے۔ ان کے مطابق اصل خوبصورتی سادگی میں ہے نہ کہ دکھاوے یا نمائش میں۔

انہوں نے 1970 کی دہائی میں روایتی جیکٹ کو نئے انداز میں پیش کر کے فیشن انڈسٹری میں انقلاب برپا کیا۔ انہوں نے بھاری اور سخت ساخت کی بجائے نرم، ہلکی اور سادہ جیکٹس متعارف کروائیں جو ان کے برانڈ کی پہچان بن گئی۔

انہوں نے اپنی پہلی مینز وئیر کلیکشن 1975 میں متعارف کرائی اور جلد ہی ان کے ڈیزائن پورے یورپ میں مقبول ہو گئے۔ انہیں اصل شہرت اس وقت ملی جب ہالی وُڈ فلم “امریکن جِگولو” (1980) میں مشہور اداکار رچرڈ گیئر نے ان کے تیار کردہ ملبوسات پہنے۔ اس فلم کے بعد وہ امریکی اشرافیہ میں بھی مشہور ہو گئے اور وہاں کے بڑے اسٹورز میں ان کے بوتیک کھلنے لگے۔

1982 میں ٹائم میگزین نے انہیں اپنے سرورق پر شائع کیا اور انہیں “جورجیو کی شاندار طرزِ زندگی” کے عنوان سے خراجِ تحسین پیش کیا۔ اس کے بعد ارمانی کا برانڈ پوری دنیا میں پہچانا جانے لگا۔ ان کا کاروبار صرف ملبوسات تک محدود نہیں تھا بلکہ اس میں خوشبوئیں، انٹیریئر، ہوٹل اور حتیٰ کہ چاکلیٹس تک شامل تھیں۔

انہوں نے ہر چیز میں خود دلچسپی لی، چاہے وہ کپڑوں کے ڈیزائن ہوں، ماڈلز کا انتخاب ہو یا تشہیری مہم۔ وہ اپنی محنت اور باریک بینی کے حوالے سے مشہور تھے۔ وہ خود کہتے تھے:
“میں ویک اینڈ کے ختم ہونے کا انتظار نہیں کرتا بلکہ جلدی سے دوبارہ کام پر لوٹنا چاہتا ہوں، کیونکہ میرا اصل سکون میرا کام ہے۔”

جورجیو ارمانی 1934 میں شمالی اٹلی کے شہر پیاچنزا میں پیدا ہوئے۔ ان کے والد ایک اکاؤنٹنٹ تھے جبکہ والدہ گھریلو خاتون تھیں۔ جنگِ عظیم دوم کے دوران انہیں کئی سخت حالات کا سامنا کرنا پڑا۔ بعد میں وہ اٹلی کے شہر میلان منتقل ہو گئے جو بعد میں ان کے فیشن کیریئر کا مرکز بنا۔

انہوں نے ابتدا میں طب کی تعلیم حاصل کی لیکن جلد ہی اسے چھوڑ دیا اور فیشن کے شعبے میں قدم رکھا۔ ابتدا میں وہ ایک ڈپارٹمنٹ اسٹور میں ونڈو ڈریسنگ کا کام کرتے تھے، پھر اطالوی ڈیزائنر نینو چیروٹی کے ساتھ کام کرنے کا موقع ملا اور یہاں سے فیشن کی دنیا میں ان کا سفر شروع ہوا۔

ارمانی نے کبھی اپنی کمپنی کو اسٹاک مارکیٹ میں شامل نہیں کیا اور نہ ہی کسی بڑے سرمایہ کار کو بیچا۔ وہ ہمیشہ اپنے برانڈ کی آزادی اور کنٹرول برقرار رکھنے کے خواہش مند تھے۔ اپنی کتاب “پر امورے” (محبت کے لیے) میں انہوں نے لکھا:
“میرے بعد بھی ایک ارمانی ہو گا۔”

انہوں نے شادی نہیں کی اور ان کی وفات کے بعد کمپنی ان کی بہن روزانا، بھانجوں، بھتیجیوں اور ان کے قریبی ساتھی لیو ڈیل اورکو کے حوالے کیے جانے کی توقع ہے۔

جورجیو ارمانی نہ صرف اٹلی بلکہ دنیا بھر میں فیشن کی پہچان بنے۔ انہوں نے مرد و خواتین دونوں کے لباس میں جدت اور سادگی کو یکجا کیا اور ایک پوری نسل کو متاثر کیا اور انہیں اعتماد بخشا۔