اردو انٹرنیشنل اسپورٹس ویب ڈیسک تفصیلات کے مطابق عالمی نمبرون ، میگا ایونٹ کے ٹاپ سیڈڈ اور دفاعی چیمپئن نوویک جوکووچ فٹنس مسائل کے باعث فرنچ اوپن ٹینس میں مردوں کے سنگلز مقابلوں کے کوارٹر فائنل سے دستبردار ہوگئے۔
سال کے دوسرے گرینڈ سلیم فرنچ اوپن ٹینس ٹورنامنٹ کے دلچسپ مقابلوں کا سلسلہ فرانس کے دارلحکومت پیرس میں شروع ہو چکا ہے، جس میں شائقین ٹینس کو انتہائی دلچسپ اور کانٹے دار مقابلے دیکھنے کو مل رہے ہیں۔
مینز سنگلز مقابلوں کے کوارٹر فائنل راؤنڈ میں سربیا کے دفاعی چیمپئن نوویک جوکووچ کا مقابلہ ناروے کے کیسپر رڈ سے تھا تاہم دفاعی چیمپئن اور ایونٹ کے ٹاپ سیڈڈ نوویک جوکووچ گھٹنے کی انجری کے باعث مقابلے سے دستبردار ہوگئے اور ناروے کے کیسپر رڈ بلامقابلہ سیمی فائنل میں پہنچ گئے۔
نوویک جوکووچ کے گھٹنے کی چوٹ کا سکین گزشتہ روز ہوا تھا جس سے یہ واضح ہو گیا تھا کہ نوویک جوکووچ کی انجری سنجیدہ نوعیت کی ہے ،جس کے بعد ٹاپ سیڈڈ نے فرنچ اوپن ٹینس ٹورنامنٹ سے دستبرداری کا اعلان کیا ۔
نوویک جوکووچ نے کہا کہ مجھے یہ اعلان کرتے ہوئے بہت دکھ ہوا کہ مجھے میگا ایونٹ سے دستبردار ہونا پڑرہا ہے۔
جوکووچ کی میگا ایونٹ سے دستبردای کے باعث ان کا 25واں گرینڈ سلیم ٹائٹل جیتنے کا خواب بھی شرمندہ تعبیر نہیں ہوسکے گا ، اس کے علاوہ وہ اے ٹی پی میں مردوں کے سنگلز مقابلوں کی عالمی درجہ بندی میں اپنی عالمی نمبر ایک کی حیثیت بھی کھو دیں گے۔