فیلڈ مارشل سید عاصم منیراور ترک وزیر کا اسٹریٹجک تعلقات کے عزم کا اعادہ
اردو انٹرنیشنل (مانیٹرنگ ڈیسک)فیلڈ مارشل سید عاصم منیر نے ترکیہ کے وزیرِ توانائی و قدرتی وسائل، الپارسلان بائرقدار، سے جی ایچ کیو میں ملاقات کی، ملاقات میں دوطرفہ تعلقات کو مزید مضبوط بنانے اور علاقائی استحکام بڑھانے پر تبادلۂ خیال کیا گیا۔
آئی ایس پی آر کے مطابق دونوں رہنماؤں نے باہمی دلچسپی کے مختلف امور پر گفتگو کی،جس میں خصوصاً توانائی کے شعبے میں تعاون بڑھانے پر توجہ مرکوز رہی۔ ملاقات میں پاکستان اور ترکیہ کے درمیان وسیع تر اسٹریٹجک تعاون کے نئے مواقع پر بھی بات چیت ہوئی۔
فیلڈ مارشل منیر نے پاکستان اور ترکیہ کے گہرے،تاریخی اور برادرانہ تعلقات کو اجاگر کیا اور عالمی فورمز پر پاکستان کی مستقل حمایت پر ترکیہ کا شکریہ ادا کیا۔ وزیر الپارسلان بائرقدار نے خطے میں امن، استحکام اور پائیدار ترقی کے لیے پاکستان کے کردار کو سراہا۔
ملاقات میں دونوں ممالک نے مشترکہ اہداف پر مل کر کام کرنے اور اپنی شراکت داری مزید مضبوط بنانے کے عزم کا اعادہ کیا۔
