فیصل کریم کنڈی نے پیپلز پارٹی اور ن لیگ کے درمیان پاور شیئرنگ فارمولے کی تفصیلات شیئر کر دی
اردو انٹرنیشنل( مانیٹرنگ ڈیسک) تفصیلات کے مطابق پاکستان پیپلز پارٹی کے رہنما فیصل کریم کنڈی نے ن لیگ اور پیپلز پارٹی کے درمیان پاور شیئرنگ فارمولے کے متعلق بات کرتے ہوئے کہا کہ خیبرپختونخوا اور پنجاب کے گورنرز پیپلز پارٹی سے ہوں گے جب کہ سندھ اور بلوچستان کے گورنرز مسلم لیگ ن سے ہوں گے۔
جیو نیوز کو انٹرویو دیتے ہوئے فیصل کنڈی نے پیپلز پارٹی اور مسلم لیگ ن کے درمیان طے پانے والے پاور شیئرنگ فارمولے کی مزید تفصیلات بتائی۔
پاور شیئرنگ فارمولے کےمطابق پیپلز پارٹی وزیراعظم، اسپیکر اور اعتماد کا ووٹ مسلم لیگ ن کو دے گی اور قانون سازی میں بھی ان کی حمایت کرے گی.
انہوں نے مزید کہا کہ ان کی پارٹی صرف اصلاح کے لیے تنقید میں ملوث ہوگی۔ دونوں جماعتیں ایک کمیٹی بنا رہی ہیں جو مشکل فیصلوں پر بات چیت کرے گی۔
وزیر خزانہ کی تقرری سے متعلق ایک سوال کے جواب میں انہوں نے کہا کہ یہ مسلم لیگ (ن) کی جانب سے وزارت عظمیٰ کے لیے نامزد کردہ شہباز شریف کا اختیار ہے۔
