افغان حکومت کالعدم تحریک طالبان پاکستان کی قیادت کو پکڑ کر حکومت پاکستان کے حوالے کرے،دفتر خارجہ
اردو انٹرنیشنل (مانیٹرنگ ڈیسک) ڈیرہ اسمٰعیل خان میں سیکیورٹی فورسز کی چیک پوسٹ پر گزشتہ روز دہشت گردوں نے حملہ کیا، حملے کے نتیجے میں 23 سیکیورٹی اہلکاروں نے جام شہادت نوش کیا۔
اس حملے کی ذمہ داری کالعدم ٹی ٹی پی سے وابستہ ایک دہشت گرد گروپ تحریک جہاد پاکستان نے قبول کی ہے.
دفتر خارجہ سے جاری بیان کے مطابق سیکریٹری خارجہ نے ڈیرہ اسمٰعیل خان میں سیکیورٹی فورسز کی پوسٹ پر مہلک دہشت گردانہ حملے کے تناظر میں افغان عبوری حکومت کے ناظم الامور کو طلب کر کے پاکستان کی جانب سے ڈیمارش جاری کردیا۔
افغان ناظم الامور سے کہا گیا کہ وہ فوری طور پر افغان عبوری حکومت کو آگاہ کریں اور حالیہ حملے کے مرتکب افراد کے خلاف مکمل تحقیقات کر کے سخت کارروائی عمل میں لائی جائے۔
افغان حکومت سے مطالبہ کیا گیا کہ وہ دہشت گردی کے اس واقعے کی عوامی سطح پر مذمت کرے اور تمام دہشت گرد گروہوں، ان کی قیادت اور ان کی پناہ گاہوں کے خلاف فوری طور پر کارروائیاں کی جائیں۔
سیکریٹری خارجہ نے مطالبہ کیا کہ افغان حکومت حملے کے مرتکب افراد اور افغانستان میں ٹی ٹی پی کی قیادت کو پکڑ کر حکومت پاکستان کے حوالے کرنے کے ساتھ ساتھ پاکستان کے خلاف دہشت گردی کے لیے افغان سرزمین کے مسلسل استعمال کو روکنے کے لیے تمام ضروری اقدامات کریں۔
بیان میں کہا گیا کہ آج کا دہشت گرد حملہ خطے کے امن و استحکام کو دہشت گردی سے لاحق خطرے کی یاد دہانی کراتا ہے، پاکستان دہشت گردی کی لعنت سے نمٹنے کے اپنے عزم پر ثابت قدم ہے اور اس عفریت کو شکست دینے کے لیے ہمیں اپنی تمام تر اجتماعی طاقت کو بروئے کار لانا ہو گا۔
