نگران وزیرِ اعظم سے امریکی کمپنی مریکل سالٹ کلیکٹیو انکارپوریشن کے وفد کی ملاقات
نگراں وزیراعظم انوار الحق کاکڑ نے بدھ کے روز کہا کہ پاکستان کا معدنیات کا شعبہ جس کی مالیت اربوں ڈالر ہے، خصوصی سرمایہ کاری سہولت کونسل (SIFC) کے تحت ترقی کی نئی بلندیوں کو چھو رہی ہے۔ وہ میرکل سالٹ کلیکٹو انکارپوریشن کے وفد سے بات چیت کررہے تھے جس نے یہاں نگراں وزیراعظم انوار الحق کاکڑ سے ملاقات کی۔
ملاقات کے دوران وزیراعظم نے امید ظاہر کی کہ پاکستان منرل ڈیولپمنٹ کوآپریشن (پی ایم ڈی سی) اور میرکل سالٹ کے درمیان مشترکہ منصوبے پر دستخط کے بعد ملک سے نمک کی برآمد میں اضافہ ہوگا۔ انہوں نے کہا کہ اس سے امریکہ کے ساتھ تجارتی تعلقات مزید مضبوط ہوں گے، “یہ مشترکہ منصوبہ اس حقیقت کا مظہر ہے کہ پاکستان غیر ملکی سرمایہ کاری کے لیے موزوں ترین منزل ہے۔”
انہوں نے کہا کہ ہمالیائی گلابی نمک دنیا بھر میں پاکستان کی پہچان ہے اور بین الاقوامی منڈیوں میں اس کی برآمد ایک خوش آئند علامت ہوگی۔ انہوں نے کہا کہ نگران حکومت نے اپنے مختصر دور میں براہ راست غیر ملکی سرمایہ کاری کو فروغ دینے اور ملک میں کاروبار کو آسان بنانے کے لیے متعدد اقدامات کیے جن کے مثبت نتائج برآمد ہوئے۔
میرکل سالٹ کے وفد نے کمپنی کے ساتھ تعاون پر حکومت بالخصوص اسپیشل انویسٹمنٹ فیسیلیٹیشن کونسل کا شکریہ ادا کیا۔ انہوں نے وزیراعظم کو بتایا کہ پاکستان میں کمپنی کے قیام کے بعد یہ دنیا بھر کی بڑی اسٹاک ایکسچینجز میں درج ہو جائے گی جس سے حکومت پاکستان اور مقامی سرمایہ کاروں کو فائدہ ہوگا۔ وفد نے وزیراعظم کو نمک کی کان کنی والے علاقوں میں معاشی بہتری، تعلیم و صحت اور مقامی آبادی کو روزگار کی فراہمی کے حوالے سے تیار کردہ لائحہ عمل سے بھی آگاہ کیا۔
