پاکستان کی سرگرم حامی،امریکی کانگریس میں پاکستان کاکس کی چیئر پرسن شیلا جیکسن چل بسیں
اردو انٹرنیشنل (مانیٹرنگ ڈیسک) امریکی کانگریس میں پاکستان کاکس کی چیئر پرسن شیلا جیکسن چل بسیں۔
ذرائع کے مطابق شیلا جیکسن کافی عرصے سے کینسر کے عارضے میں مبتلا تھیں۔
شیلاجیکسن پاکستان میں زلزلے اورسیلاب کے دوران مدد میں پیش پیش رہیں، وہ امریکی کانگریس میں پاکستان کی سرگرم حامی تھیں۔
شیلا جیکسن کو 2022 میں ہلال پاکستان سے بھی نوازا گیا۔
قومی رہنماؤں کی جانب سے اظہار افسوس:
صدر مملکت آصف علی زرداری نے امریکی کانگریس کی خاتون رکن اور پاکستان کاکس کی بانی اور شریک چیئرپرسن شیلا جیکسن لی کے انتقال پر دکھ کا اظہارکیا ہے۔
ایوان صدر پریس ونگ سے جاری بیان میں صدر مملکت نے آنجہانی کانگریس وومن کے اہل خانہ اور دوستوں سے دلی تعزیت کا اظہار کرتے ہوئے کہا کہ شیلا جیکسن ایک قابل ذکر رہنما تھیں،شیلا جیکسن نے خواتین اور بچوں سمیت انسانی حقوق کیلئے آواز اٹھائی۔
پاکستان اور امریکا کے درمیان تعلقات مضبوط بنانے کیلئے شیلا جیکسن کے کردار کو ہمیشہ یاد رکھا جائے گا۔صدر مملکت نے کہا کہ پاکستان میں 2022 کے تباہ کن سیلاب کے دوران ان کی کوششیں ناقابل فراموش ہیں،سیلاب کی مشکل گھڑی میں ان کی مدد سے سیلاب سے متاثرہ خاندانوں کو امید اور ریلیف ملا۔
وزیراعظم شہباز شریف نے جاری بیان میں کہا کہ شیلاجیکسن لی کے انتقال کے بارے میں جان کر بہت دکھ ہوا، وہ پاکستان اور امریکا کے درمیان مضبوط تعلقات کی چیمپئن تھیں۔
وزیراعظم نے کہا کہ شیلا جیکسن لی کے تعاون کو آنے والے سالوں تک یاد رکھا جائے گا، مزید کہنا تھا کہ شیلاجیکسن لی کے اہل خانہ اور ان کے سپورٹرز سے دلی تعزیت کرتا ہوں۔
چیئرمین سینیٹ سید یوسف رضا گیلانی نے امریکی رکن کانگریس شیلا جیکسن لی کے انتقال پر دکھ اور افسوس کااظہار کیا۔یہاں جاری بیان کے مطابق شیلا جیکسن لی پاکستان کی سپورٹر اور دوست تھیں،ان کے انتقال کا سن کر دکھ ہوا۔
چیئرمین سینیٹ نے کہا کہ شیلا جیکسن لی نے کانگریس میں پاکستان کے لئے آواز بلند کی۔پاکستان ایک مخلص دوست سے محروم ہو گیا ہے۔چیئرمین سینیٹ سید یوسف رضا گیلانی نے شیلا جیکسن لی کے خاندان کے ساتھ یکجہتی کا اظہار کیا۔
