عمران خان انتخابات میں دھاندلی پر آئی ایم ایف کو خط لکھیں گے, بیرسٹر علی ظفر
اردو انٹرنیشنل(مانیٹرنگ ڈیسک) تفصیلات کے مطابق راولپنڈی میں میڈیا سے بات کرتے ہوئے پی ٹی آئی کے سینیٹر علی ظفر کا کہنا تھا کہ عام انتخابات 2024 میں دھاندلی پر عمران خان کی جانب سے بین الاقوامی مالیاتی فنڈ (آئی ایم ایف) کو ایک خط لکھا جائے گا۔
بیرسٹر ظفر کا کہنا تھا کہ آئی ایم ایف، یورپی یونین اور دیگر اداروں کے چارٹر کے مطابق کسی ملک میں کام کرنے یا قرض دینے کے لیے گڈ گورننس کی ضرورت ہوتی ہے.
انہوں نے کہا کہ اچھی حکمرانی کے لیے سب سے اہم شرط جمہوریت ہے۔ 8 فروری کے انتخابات کے دوران عوام کا مینڈیٹ رات کی تاریکی میں چرایا گیا۔
انہوں نے مزید کہا کہ اگر انتخابات آزادانہ اور منصفانہ نہیں ہوئے تو کوئی بھی ادارہ ایسے ملک کو قرض دینے سے گریز کرے گا کیونکہ اس قرض سے لوگوں پر مزید بوجھ پڑے گا.
بیرسٹر ظفر نے کہا کہ تحریک انصاف انتخابی نتائج کا آڈٹ چاہتی ہے اور یہ شرط آئی ایم ایف کے سامنے رکھی جائے گی۔
