اسرائیلی بربریت جاری،غزہ میں یتیم خانے اور اسکول پر اسرائیلی فورسز کے حملے میں بچوں سمیت 65 افراد جاں بحق
اردو انٹرنیشنل (مانیٹرنگ ڈیسک) اسرائیلی فورسز نے رات گئے خان یونس کے متعدد علاقوں اور غزہ میں یتیم خانے، اسکول میں پناہ لینے والے بے گھر افراد پر حملے کیے جس کے نتیجے میں 65 فلسطینی جانبحق ہوگئے۔
غیر ملکی خبررساں ادارے ’اے ایف پی‘ کی رپورٹ کے مطابق اسرائیلی فورسز نے غزہ کی پٹی میں فضائی حملوں کے علاوہ غزہ کے جنوب میں خان یونس کے علاقوں میں بھی پیش قدمی کی جہاں اسرائیلی ٹینک دیکھے گئے۔
اسرائیلی ٹینکوں نے مشرقی اور وسطی خان یونس کے متعدد علاقوں پر حملے کیے جس سے کم از کم 40 افراد جانبحق اور درجنوں زخمی ہوئے۔
غزہ شہر میں دو فضائی حملوں میں کم از کم 22 فلسطینی شہید ہوئے، طبی ماہرین نے بتایا کہ غزہ میں بے گھر خاندانوں کو پناہ دینے والے اسکول پر ایک اسرائیلی حملے میں 17 افراد جانبحق ہوئے۔
اسرائیلی فورسز کی جانب سے دوسرا حملہ الامل آرفن سوسائٹی پر ہوا، جس میں بے گھر افراد بھی رہتے ہیں، اس حملے میں 5 افراد جانبحق ہوئے۔
