بنگلہ دیش میں کوٹہ مخالف مظاہروں میں 6افراد ہلاک
اردو انٹرنیشنل (مانیٹرنگ ڈیسک) پولیس کا کہنا ہے کہ بنگلہ دیش میں سرکاری ملازمتوں کے لیے کوٹہ سسٹم کے خلاف احتجاج کرنے والے طلباء کے ساتھ پولیس کی جھڑپوں میں 6 افراد ہلاک ہو گئے ہیں.
ہزاروں طلباء ملک گیر احتجاجی مظاہروں میں دوسرے دن بھی شامل ہوئے جب سوموار کو ریلیوں میں 100 سے زائد افراد زخمی ہوئے .
جنوری میں مسلسل چوتھی بار الیکشن جیتنے کے بعد وزیر اعظم شیخ حسینہ کی حکومت کے خلاف یہ پہلا اہم احتجاج ہے۔
واضح رہے کہ مظاہرین 1971 کی جنگ آزادی میں لڑنے والے سابق فوجیوں کے اہل خانہ کے لیے 30 فیصد سرکاری ملازمت کے کوٹے کے خلاف احتجاج کر رہے ہیں کیونکہ نوجوانوں کو بے روزگاری کا سامنا ہے۔
پولیس نے کہا کہ انھوں نے شمال مغربی بنگلہ دیش کے رنگ پور میں مظاہروں کو روکنے کے لیے آنسو گیس اور ربڑ کی گولیوں کا استعمال کیا۔
رنگپور میٹروپولیٹن پولیس کمشنر محمد منیر الزمان نے کہا کہ “ہمیں ان بے قابو طلباء کو منتشر کرنے کے لیے ربڑ کی گولیوں اور آنسو گیس کا استعمال کرنا پڑا جو ہم پر پتھراؤ کر رہے تھے۔”
انہوں نے مزید کہا کہ ہم نے سنا ہے کہ ایک احتجاجی طالب علم کو ہسپتال لے جانے کے بعد اس کی موت ہو گئی۔ یہ فوری طور پر واضح نہیں ہو سکا کہ اس کی موت کیسے ہوئی۔
رنگپور میڈیکل کالج ہسپتال کے ڈائریکٹر یونس علی نے کہا کہ ایک طالب علم کو دیگر طلباء نے مردہ حالت میں ہسپتال لائے اس طالب علم کے جسم پر زخموں کے نشانات تھے۔
بندرگاہی شہر چٹاگانگ میں احتجاج کرنے والے مزید 3 افراد ہلاک ہو گئے۔
چٹاگانگ میڈیکل کالج ہسپتال کے ڈائریکٹر محمد تسلیم الدین نے خبر رساں ایجنسی اے ایف پی کو بتایا کہ تینوں کو گولیوں کے زخم آئے ہیں۔
محمد تسلیم الدین نے مزید کہا کہ تقریباً 35 لوگ زخمی ہوئے ہیں۔
پولیس انسپکٹر بچو میا نے اے ایف پی کو بتایا کہ ڈھاکہ میں مزید 2 افراد ہلاک ہوئے جس کے بعد ہلاکتوں کی تعداد چھ ہو گئی۔
انہوں نے مزید کہا کہ دارالحکومت میں کم از کم 60 افراد زخمی ہوئے۔
علاقے میں بدامنی پھیلتے ہی نیم فوجی بارڈر گارڈ بنگلہ دیش (بی جی بی) فورس کو ڈھاکہ اور چٹاگانگ سمیت پانچ بڑے شہروں میں تعینات کر دیا گیا۔
منگل کے روز ملک بھر میں ہونے والے مظاہروں میں دسیوں ہزار طلباء نے حصہ لیا جب ایک روز قبل 100 سے زائد افراد زخمی ہوئے تھے۔ ڈھاکہ سمیت کچھ علاقوں میں مظاہرین اور عوامی لیگ کے وفادار طلباء کے درمیان جھڑپیں بھی ہوئیں جب طلباء نے بڑی شاہراہوں اور ریل رابطے کو بند کر دیا۔
بنگلہ دیش میں 56 فیصد سرکاری ملازمتیں مختلف کوٹوں کے لیے مخصوص ہیں۔ خواتین کے لیے 10 فیصد ریزرویشن ہے، 10 فیصد ملازمتیں پسماندہ اضلاع کے لوگوں کے لیے، 5 فیصد مقامی برادریوں کے لیے اور 1 فیصد معذور افراد کے لیے ہیں۔
اگرچہ نجی شعبے میں ملازمت کے مواقع بڑھے ہیں، بہت سے لوگوں کو سرکاری ملازمتیں مستحکم اور منافع بخش لگتی ہیں۔ ان میں سے تقریباً 3,000 پوسٹیں ہر سال تقریباً 400,000 گریجویٹس کے لیے دستیاب ہوتی ہیں۔
مظاہرین کا موقف ہے کہ کوٹہ امتیازی ہے اور میرٹ کی بنیاد پر ہونا چاہیے۔ کچھ لوگوں نے کہا کہ موجودہ نظام حسینہ واجد کی حمایت کرنے والے گروپوں کو فائدہ پہنچاتا ہے۔
حسینہ واجد نے منگل کے روز کہا کہ جنگ کے سابق فوجیوں کو 1971 میں ان کی قربانیوں کے لئے سب سے زیادہ احترام ملنا چاہئے چاہے ان کے موجودہ سیاسی نظریات کچھ بھی ہوں۔
انہوں نے کہا کہ “اپنی زندگی کے خواب کو ترک کرتے ہوئے، اپنے خاندان، والدین اور سب کچھ چھوڑ کر، وہ اپنے پاس جو کچھ تھا اس کے ساتھ جنگ میں شامل ہوئے.
وزیر اعظم نے کوٹے کی مخالفت کرنے والوں کو “رضاکار” بھی کہا، یہ اصطلاح ان لوگوں کے لیے استعمال کی جاتی ہے جنہوں نے 1971 کی جنگ کے دوران مبینہ طور پر پاکستانی فوج کے ساتھ تعاون کیا۔
وزارت تعلیم نے منگل کو دیر گئے کہا کہ ملک بھر کے تمام اسکولوں اور یونیورسٹیوں کو غیر معینہ مدت کے لیے بند کیا جانا تھا۔
اقوام متحدہ کے سکریٹری جنرل انتونیو گوتریس نے بنگلہ دیش کی حکومت سے مطالبہ کیا ہے کہ وہ مظاہرین کو کسی بھی قسم کے خطرے یا تشدد کے خلاف تحفظ فراہم کرے۔ “پرامن طریقے سے مظاہرہ کرنے کے قابل ہونا ایک بنیادی انسانی حق ہے۔”
