متحدہ عرب امارت میں احتجاجی مظاہرہ کرنے پر 57 بنگلہ دیشی شہریوں کو قید کی سزا
اردو انٹرنیشنل (مانیٹرنگ ڈیسک) متحدہ عرب امارت میں بنگلہ دیشی حکومت کے خلاف مظاہرے کرنے پراماراتی عدالت نے 57 افراد کے خلاف فرد جرم عائد کرتے ہوئے قید کی سزا کا حکم سنا دیا۔
اردو نیوز کے مطابق گزشتہ جمعہ کو متحدہ عرب امارات میں مقیم بنگلہ دیشی شہریوں نے اپنی حکومت کی پالیسیوں کے خلاف احتجاجی مظاہرے کیے اور درجنوں افراد کو اکھٹا کیا۔
مظاہرے کی اطلاع ملتے ہی اماراتی پولیس نے جائے وقوعہ پر پہنچ کر مظاہرین کو منتشر کردیا۔ پولیس نے مظاہرے کے سرکردہ 57 افراد کو حراست میں لے کر ان کے خلاف لوگوں کو اکھٹا کرنے اور احتجاج کرنے کی کال دینے کا جرم عائد کرتے ہوئے ان کا مقدمہ فوری سماعت کے لیے عدالت کے حوالے کردیا۔
عدالت نے ان 3 مرکزی ملزمان کو جن پر بنگلہ دیشی حکومت کے خلاف مظاہرے کی قیادت کرنے اور لوگوں کو حکومت کے خلاف اکھٹا کرنے کا الزام ثابت ہونے پر عمرقید جبکہ 53 افراد کو 10 سال اور ایک بنگلہ دیشی کو غیرقانونی طورپر امارات میں مقیم تھا کو 11 سال قید کا حکم سنا دیا
۔عدالتی احکامات میں کہا گیا تھا کہ قید کی سزا مکمل کرنے کے بعد تمام افراد کو ملک بدر کرکے ان کے پاس سے برآمد ہونے والے آلات بھی بحق سرکار ضبط کرلیے جائیں۔
واضح رہے کہ گزشتہ جمعے کو متحدہ عرب امارات میں احتجاجی مظاہرہ کرنے والوں کے خلاف پراسیکیوٹر جنرل نے فوری عدالتی کارروائی کا حکم دیا تھا۔مقدمے کی فوری سماعت اور تحقیقات کے لیے پراسیکیوشن کے 30 اہلکاروں کو تعینات کیا گیا تھا تاکہ وہ امن عامہ میں خلل ڈالنے والوں کے خلاف جلد کارروائی مکمل کرکے مقدمہ عدالت کے حوالے کریں ۔
عدالت نے تمام شواہد اور بیانات کی روشنی میں اماراتی قانون کی صریح خلاف ورزی پر احکامات جاری کرتے ہوئے فوری عملدرآمد کا حکم دے دیا ۔
