سوات: قانون نافذ کرنے والے اداروں کا مشترکہ آپریشن، 2 خوارج ہلاک
اردو انٹرنیشنل (مانیٹرنگ ڈیسک) خیبرپختونخوا کے ضلع سوات کے علاقے چارباغ میں قانون نافذ کرنے والے اداروں نے انٹیلی جنس پر مبنی مشترکہ آپریشن کے دوران شدید فائرنگ کے تبادلے میں خارجی دہشت گرد سرغنہ عطاء اللہ عرف مہران سمیت 2 خوارج کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان میں بتایا گیا کہ قانون نافذ کرنے والے اداروں نے سوات کے علاقے چار باغ میں مشترکہ آپریشن 4 اور 5 اکتوبر کی شب انٹیلی جنس کی اطلاع پر کیا۔
آئی ایس پی آر کا کہنا تھا کہ آپریشن کے دوران شدید فائرنگ کے تبادلے کے بعد خارجی سرغنہ عطاء اللہ سمیت 2 خوارج ہلاک ہوگئے جبکہ ایک خارجی کو زخمی حالت میں گرفتار بھی کیا گیا ہے۔
انٹر سروسز پبلک ریلیشنز کا کہنا ہے کہ آپریشن میں ایک خارجی کو زخمی حالت میں گرفتار کیا گیا ہے، خارجی عطاء اللّٰہ عرف مہران علاقے میں دہشت گردی کی متعدد سرگرمیوں میں ملوث تھا۔
آئی ایس پی آر نے کہا کہ خارجی مہران سوات میں غیر ملکی معززین کے قافلےکو لے جانے والی پولیس گاڑی پر حملے میں ملوث تھا۔
انٹر سروسز پبلک ریلیشنز کا کہنا ہے کہ قانون نافذ کرنے والے اداے اور سیکیورٹی فورسز ملک سے دہشت گردی کےخاتمے کے لیے پُرعزم ہیں۔
پاک فوج کے شعبہ تعلقات عامہ نے بتایا کہ علاقے میں پائے جانے والے کسی اور خارجی کے خاتمے کے لیے کلیرنس آپریشن جاری ہے۔
