وزیراعظم شہباز شریف کا دوشنبہ میں نوروز پیلس کا دورہ
وزیراعظم محمد شہباز شریف نے گزشتہ روز منگل کو نوروز پیلس کا دورہ کیا اور تاجک فن تعمیر کو سراہا۔
پی ایم آفس میڈیا ونگ نے ایک پریس ریلیز میں کہا کہ محل پہنچنے پر تاجکستان کے صدر امام علی رحمان نے وزیراعظم کا پرتپاک استقبال کیا اور دورے کے دوران ان کے ہمراہ تھے۔
بعد ازاں، تاجک صدر نے وزیراعظم اور ان کے وفد کے اعزاز میں نوروز پیلس میں عشائیہ دیا۔
وزیر اعظم محمد شہباز شریف اور جمہوریہ تاجکستان کے صدر امام علی رحمان نےموجودہ برادرانہ تعلقات پر اطمینان کا اظہار کیا اور پاکستان تاجکستان تعلقات کو مزید مضبوط بنانے کے لیے مشترکہ کوششیں جاری رکھنے کا اعادہ کیا۔
دونوں رہنماؤں نے دونوں ممالک کے درمیان موجودہ برادرانہ تعلقات کو مزید گہرا کرنے کے عزم کا اعادہ کیا جو مشترکہ تاریخ، ثقافت، جغرافیائی مناسبت اور مشترکہ عقیدے پر مبنی ہیں۔
